Тіркелмеген атыс қаруын полицияға тапсырып, оған ақша алуға болады. Сонымен қатар, әртүрлі оқ-дәрілер мен жарылғыш заттар да қабылданады. Бұл туралы Qazaq.today материалында оқыңыз.
Көрнекі фото: Getty Images / Yevgeniy Sambulov
Қазақстанның әртүрлі өңірлерінде жыл сайын тіркелмеген қаруды қабылдау іс-шаралары өткізіледі.
Бұл ретте, кәмелетке толған азаматтар атыс қаруын өз еркімен тапсырса, әкімшілік және қылмыстық жауапкершіліктен босатылады. Бастысы, ол заңсыз жолмен алынбаған болуы керек.
Сыйақы алу үшін кез келген уақытта жергілікті полиция бөлімшелеріне тиісті өтінішпен жүгінуге болады. Бұл ретте тек атыс қаруын ғана емес, басқа да заттарды тапсыруға болады.
Не тапсырып, ақша алуға болады
«Заңсыз сақталған атыс қаруын, оқ-дәрілерді және жарылғыш заттарды азаматтардың өз еркімен өтеулі түрде тапсыру қағидаларына» сәйкес, кәмелетке толған қазақстандықтар ерікті түрде тапсыра алады:
- атыс қаруы – оқ-дәрі немесе өзге зарядтың энергиясының әсерінен оқтың, снарядтың, гранатаның ұңғы арнасынан шығуы жүзеге асырылатын қару;
- жарылғыш зат – сыртқы әсердің белгілі бір түрлері кезінде жылдам өздігінен таралатын химиялық түрленуге қабілетті, жылу бөліп, газдар шығаратын зат;
- оқ-дәрілер (патрондар) – қарудың тиісті түрінен оқ атуға және нысананы зақымдауға арналған құрылғылар немесе заттар.
Сыйақы төленбейді, егер тапсырылған заттар сараптама нәтижесінде жоғарыда аталған санаттарға жатпайтын болса, сондай-ақ олар «тіркелген» немесе «қылмыстық қару» ретінде есепте тұрса.
Сондай-ақ, қолдан жасалған оқ-дәрілер, тегіс ұңғылы, газды және травматикалық қаруға арналған патрондар қабылданбайды.
Қанша ақша алуға болады
Аталған қағидалардың 17-тармағына сәйкес, қазақстандықтарға төленетін ақшаның сомасы тапсырылған қауіпті заттардың түріне байланысты:
- автоматтық ойық қару – әрбір бірлігі үшін 100 АЕК-ке дейін (2024 жылы 369 200 теңге);
- ойық ұзын ұңғылы атыс қаруы (винтовкалар, карабиндер) – бірлігі үшін 50 АЕК-ке дейін (184 600 теңге);
- ойық қысқа ұңғылы атыс қаруы (пистолеттер, револьверлер) – 40 АЕК-ке дейін (147 680 теңге);
- тегіс ұңғылы атыс қаруы – 30 АЕК-ке дейін (110 760 теңге);
- травматикалық пистолет немесе револьвер – бірлігі үшін 10 АЕК-ке дейін (36 920 теңге);
- гранаталар, миналар, жарылғыш құрылғылар және артиллериялық снарядтар – әрбірі үшін 7 АЕК-ке дейін (25 844 теңге);
- жарылғыш заттар – әрбір 1000 грамм үшін 6 АЕК-ке дейін (22 152 теңге);
- калибрі 5,6 мм-ден жоғары ойық қаруға арналған патрондар – әрбірі үшін отыз бесінші АЕК-тің бір бөлігіне дейін (105,5 теңге);
- калибрі 5,6 мм ойық (ұсақ калибрлі) қаруға арналған патрондар – әрбірі үшін жүз он бесінші АЕК-тің бір бөлігіне дейін (32 теңге).
Бұл ретте, қару-жарақ заттарының техникалық жай-күйіне байланысты төлем мөлшері ұсынылған құнның 30%-на дейін төмендеуі мүмкін (аталған қағидалардың 18-тармағы).
Осылайша, 18 жастан асқан қазақстандықтар бұрын тіркелмеген қару-жарақ, жарылғыш заттар мен оқ-дәрілерді сыйақы үшін полиция бөлімшелеріне өз еркімен тапсыра алады.
