Жетісу облысында шетелдік көліктің руліне отырған оқушы жас баланы қағып кетті, деп хабарлайды Qazaq.today ақпараттық агенттігі.
Облыстық полиция департаментінің хабарлауынша, қайғылы оқиға 23 сәуірде кешке Сарқан қаласының көшелерінің бірінде болған.
«4 жасар бала «Хонда Одиссей» автокөлігі дөңгелектерінің астына түсіп, аудандық ауруханаға жеткізілген кезде қайтыс болды. Белгілі болғандай, шетелдік көлікті 15 жастағы оқушы басқарған», — делінген ПД хабарламасында.
Сарқан ауданының полициясы аталған дерек бойынша тергеу амалдарын жүргізіп жатыр.
«Қажетті сараптамаларды тағайындай отырып, сотқа дейінгі тергеп-тексеру ҚР ҚК-нің 345-бабының 3-бөлігі бойынша(Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы абайсызда адам өліміне әкеп соққан) жүргізілуде», — делінген хабарламада.
Көлік арнайы тұраққа қойылды.
«Полиция көлікті басқаруды кәмелетке толмағандарға беруге қатаң тыйым салынғанын еске салады. Бұл талаптарды орындамау өлім мен жарақат түріндегі қайғылы жағдайға, сондай-ақ қолданыстағы заңнамаға сәйкес ауыр жазаға әкелуі мүмкін», — делінген хабарламада.
Qazaq.today
