ҚР еңбек сіңірген мәдениет қайраткері, әнші Жеңіс Ысқақова немересін бесікке салу рәсімін өткізді. Бұл туралы Qazaq.today ақпарат агенттігі хабарлайды.
Жақында әнші Instagram парақшасында немересін қарсы алуға асығып бара жатқанын айтып, көпшіліктен сүйінші сұраған болатын. «Немеремді қарсы алуға асығып барамын. Әжелер қатарына мен де қосылдым,» – деп жазды ол.
«Айлинтайдың нағашы әжесі, он бес құрсақ көтерген асыл ана шөбересінің бесігін өзі алып келді. Осындай бақыт баршаңызға жұғысты болсын. 83 жастағы құдағайыммен бірге дастархан басында ән салдық!» – деп жазды мәдениет қайраткері.
Еске салсақ, өнер иесі халық әртісі Мақпал Жүнісовадан сүйінші сұрап, немересінің руын айтқан еді. «Сүйінші, өмірге тағы бір арғынның қызы келді. Сіз сияқты арғын. Лайым, жұғысты болсын! Мерей қызымыз сізге де немере сыйласын!» – деген болатын Жеңіс Ысқақова.
Бұған дейін Жеңіс Ысқақова «Тоқал алғандардың дәуірі жүріп тұр» деп, тоқалы бар шенеуніктерді жазалауды ұсынғанын жазған болатынбыз.
