ТЖМ далаға өрт қойып жүрген жігіттің өз қызметкері екенін мойндады, деп хабарлайды Qazaq.today ақпараттық агенттігі. Даланы өртеп жүрген 39 жастағы жігітті жолай өтіп бара жатқан адамдар көріп, полицияға хабарлаған. Жанат Утеулиев Алматы қалалық ТЖД «Өрт сөндіру және авариялық-құтқару жұмыстары қызметі» ММ № 5 мамандандырылған өрт сөндіру бөлімінде жұмыс істеп келген. Сержант азаматтық қорғау органдарында 2008 жылдан бастап қызмет атқарған.
«Ж.Е. Утеулиевты Алматы облысы Жамбыл ауданының полиция бөлімінің қызметкерлері ұстап, Әкімшілік құқық бұзушылық кодексінің 1-бөлімінің 440-бабы және 1-бөлімнің 505-бабы бойынша әкімшілік жауапкершілікке тартылды. Тексеру шаралары барысында Ж.Е. Утеулиев құрғақ шөпті өртеу бойынша өз әрекетін түсіндіре алмаған, себебі ол қатты мас күйінде болған», — деп хабарлады ТЖМ баспасөз қызметі.
Қазіргі уақытта қызметтік тергеп-тексеру тағайындалды.
