Түркістан облысында нөсер жауынның кесірінен мал қырылып жатыр
Түркістан облысында тоқтаусыз жауған жаңбырдың кесірінен ауылдарды су басып, мал қырылып жатыр. Қазығұрт ауданында бес ауылды су басып қалған, деп хабарлайды Qazaq.Totay ақпараттық агенттігі.
Елуден астам үйге су кіріп, 400-дей мал қырылған. Қазығұрт Ауданы әкімдігінің мәліметінше, кеше 24 сәуір күнгі жауынның салдарынан сай саладан келген су үйлер мен қора жайларды шайып кеткен. Оқиға орнына төтенше жағдайлар қызметі тартылған. Қақпақ, Сарапхана, Шанақ, Қызылқия, Қарабау ауылдық округтерінде жауыннан жиналған суды сорғыту жұмыстары жүргізіліп жатыр. Қақпақ ауыл округіне қарасты Заңғар елді мекені, Қызылқия ауыл округі Қызылсеңгір елді мекендеріндегі сел алған жерлерді ретке келтіру бойынша төтенше жағдай қызметкерлері тиісті жұмыстар жүргізген.
«Сарапхана ауылдық округі, Сарапхана, Жіңішке елді мекенін су басқан. Сарапхана елді мекенінде 200-дей мал, Қақпақ елді мекенінде 200-ге жуық (қой, ешкі) мал шығынға ұшыраған. Қарабау ауыл округі Қарабау елді мекенінде 15 үйге су кірген. Қызылқия ауыл округі Тұғыртас елді мекеніне 1 үйге, Қызылсеңгір елді мекеніне 12 үйге су кірген. Аудан әкімі осы аталған жайттарды қалпына келтіру және шығындарын есептеу жөнінде шұғыл тапсырма берді»,- делінген аудан әкімдігінің мәліметінде.
Ал, Шанақ елді мекеніне арнайы көліктер мен төтенше жағдай қызметкерлері тартылып, ауыл тұрғындары қауіпсіз жерге шығарылды. Жұмысқа төтенше жағдайлар департаментінің 56 қызметкері, 9 бірлік техника, 11 мотопомпа және жергілікті атқарушы органдардың 19 қызметкері, 6 бірлік техника, 2 мотопомпа тартылған.
«Қазығұрт ауданының 4 елді мекенінде және Сарыағаш ауданының 1 елді мекенінде 53 үйдің ауласына, 18 үйдің, 1 тойхананың, 16 шаруашылық құрылыс нысанының ішіне су кірген. Су басқан аумақтардан 50 адам эвакуацияланып, барлығы туыстарының үйлеріне жіберілген. Үй жануарларының шығыны бар, саны анықталуда. Аудандық өрт сөндіру бөлімі мен бекеттерінің, жергілікті ауыл әкімдіктердің ұйымдастыруымен су сорғыштар арқылы көшелер мен үйдің аулаларына толған суды шығару жұмыстарымен түні бойы жүргізілді», – деп хабарлады Түркістан облысы әкімдігінің баспасөз қызметі.
