Фото: видеодан кадр
Кинорежиссер, кинодраматург Талғат Теменов «Qasqa Jol» ютуб каналына берген сұхбатында қазіргі қазақ кино және театр өнері туралы пікірін ашық айтты. Сондай-ақ су тасқынына қатысты өз ойын білдірді. Оның пайымдауынша, Қостанайдың суға кеткені — қоғамның суға кеткені екен, деп хабарлайды Qazaq Today ақпарат порталы.
Ол алдымен елдегі су тасқыны, төтенше жағдай туралы ойын бөлісті.
«Жалпы, Қостанайға қарап отырып, Қостанайдың суға кеткені, қоғамның суға кеткені деп таңертең ойлап едім. Қыстан әрең шыққан халыққа бұл үлкен соққы болды. Соның ішінде мал шығыны бар. «Арық атқа қамшы жау» демекші, елдің халықтан әрең шыққан кезде бүкіл үй-жайының, малының суға кетуі – бұл кез келген шаруаға, отбасыға, әсіресе, көпбалалы аналарға өте қиын. Біз Сирияға, Ауғанстанға көмектесіп жатырмыз. Ал негізінде нағыз көмектесуіміз керек – ол біздің өз бауырларымыз. Ағайын, жұрт боп бірігіп, халыққа қол ұшын созуымыз қажет. Су тасқыны мемлекеттік тұрғыдан үлкен – катастрофа, үлкен қауіп-қатер төніп тұр деп ойлау керек», — деді Талғат Теменов.
Сондай-ақ театр өнерінің аяқалысына қарны ашатынын жеткізді. оның айтуынша, қазіргі кезде театр ұлтық өнеріміз бен мәдениетімізді олпы-солпы, қалай болса, солай көрсетіп жатыр.
«Театр тек қана ән айтып, би билейтін жер емес. Театр – талбесік, ол идеология. Театрда ұлттың қамы, ұлттың намысы, ары, әдебиеті, мәдениеті, тарихы, тәрбиесі айтылатын мінбер. Театр әрі идеологиялық орын, бір жағынан біздің салт-дәстүрімізді, ата-абамыздан келе жатқан ана тілімізді сақтайтын талбесік. Өкінішке қарай, қазіргі театрлар мына Астанадағы театрлардың барлығы бүгінде жалт-жұлт еткен бояуға құмар болды. Қойған спектакльдері эксперименталды түрде Мәскеуде оқып келген 3-4 курстың балаларының деңгейінде. Театр – ұлттың тарихын, ұлттың жоғын жоқтайтын, ұлттың мәдениетін көрсетудің орнына ырду-дырдудың, қызыл-жасылдың ортасына айналып бара жатыр», — деді ол.
