Бангкоктағы люкс қонақ үйде алты шетелдіктің мәйіті табылды, деп хабарлайды Qazaq.today сайты AsiaOne басылымына сілтеме жасап. Таиланд премьер-министрі Сеттха Тхависин бұл оқиғаға қатысты мұқият тергеу жүргізуді бұйырды.
Сайттың мәліметінше, бұл туралы полицияға қонақ үйдің қызметкерлері хабарлаған.
«Таиланд полициясы өз мәлімдемесінде, қаза болғандардың барлығы шетел азаматтары екенін хабарлады», — делінген материалда.
Қаза болғандардың ішінде кем дегенде бір адам Вьетнам текті америкалық азамат екені атап өтілді.
«Бұл оқиға Бангкоктағы Grand Hyatt Erawan люкс қонақ үйінде орын алып, Таиландтың туризм саласын одан әрі дамытуға бағытталған әрекеттері кезінде болды. Туризм – Оңтүстік-Шығыс Азиядағы екінші ірі елдің экономикасының маңызды қозғаушы күші», — деп көрсетілген мақалада.
Үкімет таратқан мәлімдемеде премьер-министрдің бұл жағдайды шұғыл тергеуді тапсырғаны және туризм саласына ықтимал зиянның алдын алу шаралары қарастырылып жатқандығы айтылды.
Айта кетейік, Қазақстан азаматтары Таиландта визасыз 60 күнге дейін бола алады. Бұл Таиландтың Ішкі істер министрлігі қабылдаған шешімнің арқасында мүмкін болды, ол Қазақстанды қоса алғанда 93 ел мен аймақтарға визасыз режимді кеңейтті. Бұрын Қазақстан азаматтары Таиландта визасыз тек 30 күнге дейін бола алатын еді.
