Астана қаласының тұрғыны Нұрлан Лесбекұлы әлеуметтік желілерде тараған «Астананың бас имамына тиесілі зәулім үй» туралы қауесетті жоққа шығарды. Ол бұл үйдің өз меншігі екенін мәлімдеді.
Жалған ақпарат қалай тарады?
Бірнеше күн бұрын әлеуметтік желіде белгісіз ер адам үлкен үйдің видеосын түсіріп, оны Астана қаласының бас имамы Ерболат Жүсіповке тиесілі деп мәлімдеген. Видео авторы бұл ғимаратты мешітпен шатастырғанын, кейін оның бас имамның жеке үйі екенін «анықтағанын» айтады.
«Бұл Астананың бас имамының үйі екен. Мешіт сияқты дәу ғой. Ал енді садақа жіберіңдер. Сендердің садақаларыңмен жалақысын төлейді. Бір гектар жерді қоршап алған», – деген видео авторы.
Видео қысқа уақытта кең таралып, қызу талқылана бастады.
Нұрлан Лесбекұлы: «Бұл – менің үйім»
Алайда, бұл ақпарат шындыққа жанаспайтыны белгілі болды. Қазақстан мұсылмандары діни басқармасының (ҚМДБ) ресми өкілі Ағабек Қонарбайұлы жалған ақпаратты жоққа шығарған видео жариялады.
Видеода үйдің шын иесі Нұрлан Лесбекұлы өзі сөйлеп, былай деді:
«Мен Нұрлан Лесбекұлы! Кейінгі кезде осы үй әлеуметтік желіде бас имамның үйі деп көрсетілген екен. Ол – жалған ақпарат. Бұл – менің үйім. Мен осы үйде 15 жылдан бері тұрамын. Өзім салып, өзім кіргенмін.»
Бас имам Ерболат Жүсіпов жалған ақпаратқа қатысты пікір білдірді
Осы оқиғаға байланысты Астана қаласының бас имамы Ерболат Жүсіпов те мәлімдеме жасап, жалған ақпарат таратудың салдары туралы айтты.
«Соңғы уақытта әлеуметтік желілерде ұстаздарымызға, имамдарымызға әртүрлі жалалар көп тарай бастады. Біреудің ақысын жеу, зұлымдық жасау, әділетсіздік арту – үлкен күнә. Бабадан қалған асыл сөздер мен құндылықтарды аяққа таптау дұрыс емес», – деді ол.
Жалған ақпараттың салдары қандай?
Қазіргі кезде әлеуметтік желілерде жалған ақпараттың жылдам таралуы адамдардың беделіне нұқсан келтіріп, қоғамда алауыздық тудыруы мүмкін. Сондықтан:
- Ресми дереккөздерге сүйену,
- Ақпаратты тексеріп, расталмаған мәлімет таратпау,
- Жалған мәлімет таратқандарға заң жүзінде шара қолданылуы мүмкін екенін ескеру қажет.
Бұл оқиға – фейк жаңалықтарға сенбеудің және тексерілген ақпаратқа ғана жүгінудің маңыздылығын көрсетті.
