Батыс Қазақстан облысының Шыңғырлау ауданында он саусағынан өнер тамған шеберлер аз емес. Солардың қатарында ата-баба дәстүрін жандандырып, мал шаруашылығының маңызды өнімінің бірі – қой жүні мен түйе жүнін кәдеге асырып отырған көпбалалы ана Мирамгүл Ізғалиеваны айрықша айтуға болады, деп хабарлайды Qazaq.today.
Тасмола орта мектебін аяқтаған жас түлек 1999 жылы Орал қаласындағы гуманитарлық академияны тәмамдап шыққан. Дипломын қолға алғанымен, өзінің бала кезден арманы болған жеке кәсібін ашуға бет бұрады. Ол 2019 жылы аудандық жұмыспен қамту орталығы арқылы бір айлық «Бизнес-Бастау» курсын тәмамдап, сертификатқа қол жеткізеді. Мемлекеттік грант арқылы берілген 505 мың теңге қайтарымсыз қаржыға іс тігетін машинасын сатыпалып,. алғашқыда тапсырыс бойынша ересектер мен балаларға киімдер тігіп бастайды. Балаларына да балабақшада, мектепте өтетін мерекелік шараларға әдемі костюмдерді тігіп жүр. Қолы босай қалса жүн иіріп, балаларына табиғи жүннен қолғап, жылы шұлықтар т.б. тоқып беріп отырады.
Бала күтіміне байланысты демалысқа шыққан соң қыз жасауын тігуді қолға алған Мирамгүлдің қолынан шыққан жамылғы және төсек көрпелеріне Астана, Атырау, Ақтөбе қалаларымен қоса көрші Ресейден де тапсырыс берушілер көп. Бос уақытында тұрғындар өтінішімен ескі көрпелерді де жаңалау жұмыстарымен айналысуда. Өзінің қолынан шыққан бұйымдарымен 2019 жылы Орал қаласында өткен «KorpeFEST» облыстық қолөнер көрмесіне қатысып, алғыс хатқа ие болған.
-Мен қарапайым отбасында дүниеге келдім. Әкем Қойшығұл Тасмола совхозында ұзақ жылдар алдыңғы қатарлы механизатор, ал анам Ақзия шаруашылық меңгерушісі болып жұмыс жасады. Қолы боста іс тігумен, тоқыма тоқумен айналысатын анамнан үйренгенім болашақта өз кәсібімді ашуға жол сілтеді. Үлкен қызым тұрмысқа шыққанда барлық жасауын өзім тігіп шыққан болатынмын. Осыдан кейін қыз жасауын тігуді қолға алдым. Көрпеге жүнді 100 келіге дейін ауылдық жерден сатыпаламын, ал, түйе жүнін Ақтөбеден алғызамын. Шайырынкетіріп жуып, түтіп, жасаған көрпелерімнің неғұрлым сапалы болуына көңіл бөлемін. Жолдасым Есенаманмен 5 ұл-қыз тәрбиелеп отырмыз. Балаларымның бірі спортқа жақын болса, бірі қолөнерге бейім. Әсіресе, кіші қызым Альмираның іс тігуге қызығушылығы жоғары. Үнемі жанымнан табылып көмектесіп жүреді. Алдағы уақытта тағы да мемлекеттік грантқа қол жеткізер болсам, жүн түтетін станок сатып алу жоспарымда бар дейді», — Мирамгүл Қойшығұлқызы.
Қай уақытта да шаруаның ебін таба білген жанұя құс асырап, бау-бақша егіп, жеміс ағаштарын күтіп-баптауға да уақыт табады. Өзінің сүйікті ісін кәсіпке айналдырып, мемлекеттік қолдауды тиімді пайдаланып жүрген Мирамгүлдің алға қойған мақсаттарына жетері күмәнсіз.
Qazaq.today
