Шерзат Полат ісі бойынша сот процесінде өзгеріс: ағайынды Тоқтаубаевтардың адвокаттары ауысты. Бұл туралы Qazaq.today хабарлайды.
Алматыда 16 жастағы Шерзат Полаттың өліміне қатысты кезекті сот отырысы өтті. Отырыста басты жаңалық – сотталушылар Нұрбол және Азамат Тоқтаубаевтардың жаңа қорғаушылары өздерін таныстырды.
Атап айтқанда, Азамат Тоқтаубаевтың адвокаты ретінде Алматы облыстық адвокаттар алқасының мүшесі Нұрсұлтан Досжанов, ал Нұрбол Тоқтаубаевтың қорғаушысы ретінде Азамат Сағымбек сотқа қатысты.
Сот процесінде мемлекеттік айыптаушылар тарапынан дәлелдемелерді жариялау жалғасуда. Бұған дейінгі сот отырысында айыпталушы Абзал Шынасыл өз бет-жүзін ашып, Шерзат Полатты тепкенін және Нұрқанат Ғайыпбаевқа пышақ сұққанын мойындаған еді. Ал басқа бір сотталушы, Дидар Қалиахмет, өзін шындық детекторымен (полиграфпен) тексеруді ұсынды.
Қазіргі уақытта Шерзат Полаттың өліміне қатысты сот отырысы тікелей эфирде жүріп жатыр. Көрермендер сот барысын Azattyq Ruhy YouTube арнасынан тікелей көре алады.
