Талдықорғанда өтіп жатқан Шерзат Болатқа қатысты қылмыстық іс бойынша сот отырысында Талғар аудандық полиция басқармасы Криминалдық полиция бөлімінің бастығы Медет Әділжаннан жауап алынды, деп хабарлайды Qazaqtoday ақпараттық агенттігі.
Судья Ержан Жанұзақов полиция қызметкерінен жәбірленуші Нұрқанат Ғайыпбаевтың бейнежазбасы қандай заңдық негізде түсірілгенін сұрады. Бұл сұраққа жауап берген Медет Әділжан бейнематериал жедел іздестіру шарасы аясында түсірілгенін айтты, алайда нақты заң бабын атай алмады.
«Жедел іздестіру шараларын жүргізу үшін күдіктілер мен куәгерлерден жауап алынды. Бірақ нақты қай бап екенін қазір нақты айта алмаймын», – деді ол.
Сотта сондай-ақ Ғайыпбаевтың берген айғағы мен бейнежазбаның мазмұны да талқыланды. Медет Әділжанның айтуынша, жәбірленуші оқиғаға қатысты суреттерді қарап отырып, кімнің қандай әрекет жасағанын көрсеткен.
«Видеода не бар, соны ғана білемін. Одан бөлек арамызда жеке әңгіме болған жоқ. Тек суреттер арқылы пышақтаған адамдарды көрсетті», – деді полиция басшысы.
Сонымен қатар, Медет Әділжан Ғайыпбаевтан толық жауап алынбағанын, іс бойынша бірнеше тергеу тобы параллель жұмыс істегенін атап өтті.
«Маған жәбірленушімен байланысып, тек нақты мәліметтерді алу жүктелді», – деді ол.
