Жеңіліп көрмеген қазақстандық файтер Шавкат Рахмонов (18-0) жаттықтырушысы Баян Жанғаловқа көлік сыйға тартты, деп хабарлайды Qazaq Today ақпарат агенттігі.
Шавкат аталған көлікті тізгіндеп барып, кілтін бірден тренеріне табыстаған.
«Ассалаумағалейкум, Қазақ Елі! Бас бапкерім Баян Жанғаловқа,бүгін күн темір тұлпар сыйлауға Алла нәсып етті. Демеушілік беріп, қолдау білдірген ағам Алидар Болатұлына ризашылығымды айтамын», — деп жазды ол.
Былғары қолғап шебері Шавкат Рахмонов тренері Баян Жанғаловтың жетекшілігінде ММА бойынша әлем чемпионы атанса, M-1 Global лигасында чемпион титулын жеңіп алғанын сондай-ақ UFC алаңына шыға бастағанын еске саламыз.
Дивизионның жаңартылған тізімінде «Номад» лақап атымен танымал қазақстандық спортшы үшінші орында тұр. Оның алдында Белал Мұхаммад (2-орын), Камару Усман (1-орын) және чемпион Леон Эдвардс орналасқан. Колби Ковингтон бесінші орынға сырғыды.
