БҚО әкімі халықты Республика күнімен құттықтап, бірқатар азаматтарды марапаттады, деп хабарлайды Qazaq.today ақпараттық агенттігінің тілшісі. Облыс әкімі Нариман Төреғалиев өңірді дамытудағы жоспарларымен де бөлісті.
Ұлттық мейрамды атап өту үшін зиялы қауым өкілдері, мемлекеттік қызметкерлер, әскерилер және қарапайым тұрғындар жиналды. Алдымен мемлекеттік әнұран шырқалып, әскерилер шаһардағы ең биік Ту тұғырына көк байрағымызды көтерді.
Ұлттық мерекеге арналған шаралар легі «Атамекен» өнер ордасында жалғасты. Мұнда «Тарихқа толы Қазақ Елі», «Аймақ жетістіктері» көрмесі жасақталған.
Салтанатты шарада облыс әкімі Нариман Төреғалиев Жайық жұртшылығын қастерлі мерекемен құттықтап, өңірде экономика, ауыл шаруашылығы және әлеуметтік салалар бойынша атқарылып жатқан жұмыстар туралы баяндады.
«Ұлттық құрылтайда Мемлекет басшысы Республика күніне ұлттық мереке мәртебесін қайтаруды ұсынып, бұл мейрам елдің мемлекет құру жолындағы тарихи қадамының символы болуы керек екенін айтты. Бұл жай ғана мереке емес, бұл біздің елдігімізді сақтауға және нығайтуға деген ұмтылыс. Биыл облыста 81,5 млрд теңгеге 617 шақырым жолды жөндеу жұмыстары басталған еді. Қазіргі таңда соның 500-ге жуық шақырымы пайдалануға берілді. Ал 2024 жылы 105 млрд. теңгеге жалпы ұзындығы 800 шақырым жол салуды жоспарлап отырмыз. Спорттық инфрақұрылымды дамыту үшін 2019 жылдан бастап 9 дене шынықтыру-сауықтыру кешені салынды. «Жайлы мектеп» ұлттық жобасы және басқа қаражат көздері есебінен 26 мектеп құрылысын бастадық. Оның екеуі пайдалануға берілсе, жыл соңына дейін 14 мектеп құрылысын аяқтаймыз» — деді Батыс Қазақстан облысының әкімі Нариман Төреғалиев.
Мерекелік шара концерттік бағдарламаға ұласып, патриоттық шығармалар орындалды. Айта кетейік, облыста Республика күніне орай 500-ден іс-шара ұйымдастырылды. Соның ішінде Өлеңті мен Асан ауылдарында медициналық нысан, Оралда биг-бэг зауыты ашылды. Шағырлыой ауылы орталықтандырылған ауызсу желісіне қосылды. Ақпәтер ауылында ашық аспан астындағы музей, Хан Ордасы ауылында визит орталығы қолданысқа берілді. Ветеринарларға, полицейлер мен әскерилерге қызметтік көліктер тапсырылды. Облыс орталығында 10 жаңа автобус желіге шықты. Білім беру ұйымдарында да патриоттық шаралар өтіп, балалар белсене қатысты. Ұлттық мереке әр үйге шаттық сыйлап, жарқын сәттермен есте қалды.
Qazaq.today
