Ресей азаматтарының Қазақстанға келуі 2021 жылмен салыстырғанда екі есе өсті. Ұлттық қауіпсіздік комитеті мәліметінше, ақпан-сәуір аралығында Қазақстанға 128 мыңнан астам ресейлік келген, — деп хабарлайды Qazaq.Today тілшісі Tengrinews.kz сілтеме жасап.
«Биыл ақпан-сәуір аралығында Қазақстанға 128 мыңнан астам Ресей азаматы және 3 074 Украина азаматы келген. 2021 жылдың осы кезеңінде Қазақстанға 58 мыңнан астам Ресей азаматы және 2 617 Украина азаматы келген. Деректер 2021 жылмен салыстырғанда Ресейден келетін азаматтар ағыны екі есеге, ал Украинадан 15 пайызға артқанын көрсетеді», — деді ведомство редакцияның ресми сауалына берген жауабында.
Бұған дейін 2022 жылдың қаңтар-наурыз аралығында 16 837 Ресей азаматы Қазақстанда уақытша тұруға рұқсат алғаны хабарланған болатын. Ішкі істер министрлігі мәліметінше, ең көп ресейліктер Қызылорда облысына — 2463, Алматыға — 2116, БҚО — 1677, Қостанай облысына 1525 келген.
