Фото: Egemen.kz
Бір айда өндіріс көлемі үштен бірге, бір жылда 2,4 есеге қысқарды, деп хабарлайды Qazaq.today.
Data_hub мәліметтері бойынша, маусым айында конвейерлерден 5,5 мың жеңіл жолаушы көлігі шыққан. Айлық көрсеткіш бойынша өндіріс үштен бірге, жылдық көрсеткіш бойынша 2,4 есеге қысқарған. Бұл көрсеткіш 2021 жылдың мамыр айынан бергі ең төменгі деңгейге жеткен.
Өндіріс көлемінің төмендеуі қаңтар-маусым айларының қорытындысы бойынша да байқалады. Қазіргі деңгей өткен жылмен салыстырғанда 14,3%-ға төмен – 57,1 мың бірлікке қарсы 66,6 мың бірлік. Маусым айынан бөлек, наурыз және мамыр айлары да сала үшін сәтсіз болды.
Алты айлық көрсеткіш соңғы сегіз жылда алғаш рет төмендеді. Алдыңғы жеті жылда өндіріс қарқынды өсіп, тіпті пандемия және геосаяси жағдайлардың ушығуы кезінде де өсуін тоқтатпаған.
Сонымен қатар, жаңа жеңіл көліктердің, оның ішінде коммерциялық техниканың сатылым динамикасы да қаңтар-маусым айларында теріс нәтиже көрсетті. Қазақстан Автокөлік Одағының (КАО) мәліметтері бойынша, бұл көрсеткіш 0,1%-ға төмендеп, 83,15 мың бірлікті құраған.
