Қарттар үйіндегі жағдайды ашып көрсететін жаңа қойылым көрерменге жол тартпақ. Жезқазғандағы қазақ музыкалық-драма театрының актерлары ерекше қойылымды сахналамақ, деп хабарлайды Qazaq.today ақпараттық агенттігінің тілшісі. Адамның жан дүниесін тебірентер спектакль «СЕН және МЕН» деп аталады.
Қарттар үйіндегі қарапайым тіршілік. Елеусіз ғана өмір сүріп жатқан қариялардың жай-күйі қоғамды аса алаңдатпайды. Ал бұл спектакльде өзгелер үшін тым-тырыс көрінетін өмірдің шын мәнінде мүлдем басқаша екені көрсетіледі. Әркімнен жылулық күткен жандардың жанайқайы естіледі. Біз біле бермейтін беймәлім дүниенің қыры мен сыры ашылады.
Басты рөлде Қазақстанның халық әртісі, Қазақстанның еңбек сіңірген қайраткері Досжан Жанботаев ойнайды. Қойылымның режиссері Шағуан Үмбетқалиев.
Қойылым барысында әртістер адам өміріндегі бес түрлі жағдайды сипаттайды.
ҮМІТ — адамды орнынан қозғайтын күш. Ажалдан алшақтататын дүние. Ажалмен өмірдің арасындағы көпір іспеттес. Үміт-өмірдің тоқтамас құмсағаты…
ЖАЛҒЫЗДЫҚ— трагедияның ең биігі. Адамның өлімге апаратын қыл көпірі. Ішкі жан дүниенің бос айғайы…
ОТБАСЫ — адамның алданышы. Оның сынағы, бақытты шағы, өмір сүруге деген мотивациясы…
ҚАРИЯ мен БАЛА… Өмір мен өлім арасын жалғайтын ала арқан. Өмірдің алмасуы. Екеуінің арасындағы «өмір» дейтін даңғыл жол…
Тұсаукесер Жезқазған қаласында 29-31 мамыр күндері аралығында өтеді.
