Алматыда ұзақ жыл отасқан әйелін пышақтап өлтірген жігіт сотталды. 9 ай бұрын 42 жастағы әйелін күйеуі он рет пышақтап өлтірген еді. Әл-Бейне Зарипованы айуандықпен өлтірген Сабыржан Зарипов ақыры 15 жылға сотталды, деп хабарлайды Qazaq.today.
Прокурор айыпталушыны 15 жылға бас бостандығынан айыруды сұрады. Бұған дейін жәбірленушінің адвокаты 20 жыл талап еткен еді.
Сот үкімімен Әл-Бейне Зарипованың бұрынғы күйеуі қасақана кісі өлтіргені және бөтеннің мүлкін ұрлағаны үшін кінәлі деп танылды. Ол 15 жылға бас бостандығынан айыру жазасын орташа режимдегі колонияда өтейді. Судья айыпкердің өзінің қылмысын мойындағаны үшін жазаны жеңілдеткен.
Марқұм әйелдің туыстары Зарипованың күйеуі аффект күйінде кісі өлтіргені үшін кінәлі деп тануды талап еткен. Дегенмен Алматының қылмыстық істер жөніндегі мамандандырылған ауданаралық сотының судьясы қылмыстың «аффект» жағдайында жасалмағанын нақтылады. Айта кетейік, Әл-Бейна Зарипова 26 қыркүйекте 43 жасқа толатын еді.
Еске салайық, бұған дейін Алматыда ер адам әйелін 10 рет пышақтап, бес миллион теңгесін ұрлап, жертөлеге тастап кетті деп айыпталғанын жаздық. Жәбірленушінің жақындары күдіктінің жазадан оңай құтылып кетуінен қорқып, резонанс тудырғысы келеді. 42 жастағы Әл-Бейне Зарипова FlyDubai компаниясының Қазақстандағы серіктес компаниясының қаржы директоры болған.
Күйеуімен отау құрғандарына 15 жылға жуықтап, 12 жасар қыз тәрбиелеп өсірді. Осы жылдың 31 қаңтарында таңғы сағат 08:00-де ол 10 рет пышақ жарақатын алып, азаптанып өлді. Кісі өлтіру оқиғасы ерлі-зайыптылардың Медеу ауданының элиталық бөлігіндегі жеке үйдің жер төлесінде болған.
Тергеу барысында Сабыржан Зарипов әйелінің ойнас жасап, көзіне шөп салғанын жасырмай ашық айтқанын мәлімдеген еді. Әйелінің өзі аузынан опасыздықты естіген күйеуі Әл-Бейнені пышақтап тастаған.
