Түркия шоу-бизнесінің жұлдызы, әлемге әйгілі әнші Таркан ауыр қайғыға душар болды – оның анасы Неше Теветоғлу сәуір айының ортасында Анталья қаласындағы ауруханада жүрек талмасынан қайтыс болды, деп хабарлайды Qazaq Today ақпарат порталы.
Қайғылы хабар тарағанда Таркан Германияда, өзінің еуропалық турнесі аясында сапарда жүрген. Анасынан айырылғанын естіген соң, ол шұғыл түрде Ыстамбұлға ұшып келіп, жерлеу рәсіміне қатысты.
Анасының дүниеден өткені туралы Таркан алғаш рет әлеуметтік желіде жүрекжарды жазба жариялап, қоштасу хатын бөлісті:
«Анадан айырылу – ішкі жан дүниеңде лапылдап жанған от секілді. Бұл от оңайлықпен сөнбейді. Қиын сәттерде жанымда болғандарыңыз – мен үшін өте қымбат. Бұл кезеңде маған қолдау білдірген барлық сүйікті жандарға, тыңдармандарыма, отбасым мен достарыма шын жүректен алғысымды білдіремін», – деп жазды әнші.
Таркан сондай-ақ осы қиын шақта ерекше қолдау көрсеткен жарына – Пынарға ризашылығын білдірді:
«Бұл ауыр кезеңде әрдайым жанымнан табылғаның үшін ризамын. Қызымыздың күлімдеген жүзі жүрегімдегі ауыртпалықты жеңілдетуге көмектеседі. Сендер барсыңдар – соған мың алғыс», – деді ол.
