Мәжіліс депутаты, «Ауыл» халықтық-демократиялық патриоттық партиясының мүшесі Жигули Дайрабаев партия төрағасының орынбасары қызметінен босатылды. Бұл туралы 27 ақпан күні партияның ресми сайтында жарияланды.
Бұл туралы Qazaq.today ақпарат агенттігі хабарлайды.
«Ауыл» партиясының фракциясы өткізген жиында партияның қызметіне байланысты бірнеше мәселе қаралған. Жиын қорытындысы бойынша, Жигули Дайрабаевты партия төрағасының орынбасары қызметінен босату туралы ұсынысты партияның саяси кеңесі президиумына жолдау жөнінде шешім қабылданды.
Дайрабаевтың мәлімдемесі неліктен дау тудырды?
Жигули Дайрабаевтың қызметінен босатылуына оның Солтүстік Қазақстанға жасаған сапары кезінде айтқан пікірі себеп болуы мүмкін. Депутат бұл өңірде қазақ тілінің қолданылу деңгейіне көңілі толмайтынын ашық білдірген еді.
«Идеологияға жауапты азаматтарға сұрақ: бізде солтүстік өңірлерде елді мекендердің, көшелердің атауы қашан мемлекеттік тілімізге ауысады? Масқара ғой, айналайындар, 34 жылдан бері тәуелсіз Қазақстан мемлекетінде өмір сүріп жатырмыз. Солтүстік аймаққа сенбіде барып қайттым. Кірсем, басқа бір мемлекетте жүрген сияқты сезінесің. Біздің ешкімге өкпеміз жоқ. Бірақ біз қазақ ұлты мемлекет құраушы ұлтпыз. Неге бізде қазақша болмайды? Кім кедергі? Қай жаққа сіздер қарап отырсыздар? Көргенде жан ауырады», – деген болатын Дайрабаев.
Бұл пікір қоғамда түрлі реакция тудырды. Кейбіреулер депутаттың қазақ тілінің қолданылуын талап етуін қолдаса, енді біреулер оның сөзін даулы мәлімдеме деп санады.
Дайрабаевтың қызметтен кетуі саяси шешім бе?
Саяси сарапшылардың пікірінше, Жигули Дайрабаевтың партиялық лауазымынан босатылуы оның мәлімдемесімен тікелей байланысты болуы мүмкін. Қазақстанда тіл мәселесі – әрдайым өзекті тақырыптардың бірі, әсіресе, Солтүстік аймақтарда.
Айта кету керек, Жигули Дайрабаев бұған дейін де әртүрлі мәлімдемелерімен көпшілік назарында болған саясаткерлердің бірі. Оның отставкасы партия ішіндегі ішкі процестер мен мемлекеттік саясаттағы белгілі бір өзгерістердің нәтижесі болуы мүмкін.
Осы оқиға қоғамда үлкен пікірталас тудырып, қазақ тілінің мәртебесі мен оның қолдану аясы туралы мәселелерді қайтадан күн тәртібіне шығарды.
