️ Египет, Түркия, Таиланд… бірақ ешқандай демалыс болмады
Костанайда туризм саласындағы алаяқтық бойынша іс сотта қаралып жатыр. Туристік агент шетелге турлар мен әуе билеттерін рәсімдеймін деп уәде беріп, Қазақстан мен Ресей азаматтарынан жалпы сомасы 55 миллион теңге ақша алған.
«Клиенттер Египет, Түркия, Таиланд, Вьетнам және Қытай елдеріне демалыс жоспарлаған. Бірақ турлар мүлде брондалмаған. Кейбірі ұшар күннің өзінде билеті де, қонақүй құжаты да жоқ екенін кеш білген», – делінген прокуратура ұсынған мәліметте.
Сенім мен үміт – ақшаға айналған
Зардап шеккендердің кейбірі несие алып, алданған. Бастапқыда залал көлемі 40 млн теңге деп көрсетілсе, кейін жәбірленушілер саны артқан сайын сома 55 миллион теңгеге жеткен. Қазіргі таңда 70-ке жуық адам зардап шеккені белгілі.
Сот процесі жалғасуда
Сотта куәгерлерден жауап алынуда. Айыпталушы әйел өз кінәсін мойындамай, мәлімдеме жасаудан бас тартып отыр. Бұған дейін ол «турларды өзіндік құнымен саттым, сол себепті қаржы тапшылығы туындады» деп түсіндірген. Алайда полиция ешқандай брондау немесе билетке қатысты құжат таппаған.
«Сот барысында жаңа бір отбасының да алданғаны белгілі болды. Әйел бұл алаяқтықты тіпті тергеу кезінде де жалғастырған, – деді жәбірленушілердің бірі.
Жәбірленушілер не күтуде?
Зардап шеккендер ақша шығынын, моральдық зиянды өтеп алуға үміттенеді.
