Каспий құбыр консорциумы нысандарының жұмысы толығымен қалпына келтірілді. «Құрманғазы» мен «Исатай» мұнай шығару станциялары штаттық режимде жұмыс істеп тұр, деп хабарлайды qazaq.today сайты Каспий құбыр консорциумының ресми сайты-на сілтеме жасап.
Каспий құбыры консорциумының баспасөз қызметінің мәліметінше, «КҚК-К» АҚ қызметкерлері мен мердігерлері ауа райының қолайсыздығы салдарынан болған оқиғадан кейін бірден қалпына келтіру жұмыстарын бастаған. Бұған «KEGOC» АҚ-ның электр желілерін басқару жөніндегі қазақстандық компаниясының апаттық бригадалары белсене атсалысқан. Консорциум аталған кәсіпорынның өз апаттық қорынан қажетті 220 кВ-тық тірек бөліп, оларды жедел тиеу мен жөнелтуді ұйымдастырғанын атап өткен. «Қазіргі уақытта Теңіз-Новороссийск мұнай құбыр жүйесі қалыпты жұмыс істеп тұр, бұл мұнай жөнелтушілердің сұраныстарын орындауды қамтамасыз етед», — делінген хабарламада. Еске сала кетейік, 27 шілдеде болған қатты желден электр желісінің жеті тірегі құлаған. Салдарынан «Құрманғазы» мен «Исатай» станцияларын энергиямен жабдықтауда қиындықтар туындады.
