Kaspi банкінің атқарушы директоры Маржан Ельшибаева британдық азаматпен тұрмыс құрды, деп хабарлайды Qazaq.today.
Бұл туралы ол өзінің әлеуметтік желілерінде мәлімдеді. Ельшибаеваның айтуынша, оның күйеуі Пол есімді азамат.
«Жеке өмірімдегі оқиғалар осындай үлкен реакция тудырады деп ойлаған жоқпын. Сіздердің құттықтауларыңызды оқығаныма ерекше қуаныштымын. Тіркеу Англияның Борнмут қаласының әдемі ескі мэрия ғимаратында өтті. Менің күйеуім ағылшын азаматы, оның есімі Пол. Мен өз елімнен кетуді жоспарлап отырған жоқпын. Керісінше, күйеуімді Қазақстанға көшуге көндірдім. Ол мен үшін өз жақындарын, достарын, жайлы тұрмысын тастап, жаңа елге көшуге шешім қабылдады – бұл үлкен ерлік. Енді оның маған деген махаббатына күмәнім жоқ», – деді ол.
Маржан Ельшибаева шамамен 20 жыл Қазақстанның медиа саласында қызмет етіп келеді. 1994 жылы КТК арнасындағы «Апта» бағдарламасында репортер болды. Кейінірек «Тотем» арнасында басталған «Информбюро» жаңалықтарында жұмыс істеді, кейін бұл жаңалықтар «31-арнада» эфирге шыға бастады. 2002 жылы «Интерньюс-Қазақстан» ұйымына келіп, «Ашық Азия» бағдарламасының журналистінен атқарушы директорға дейінгі жолды өтті. «Телерадио хабарларын тарату туралы» және «Ақпаратқа қол жеткізу туралы» заң жобаларын әзірлеу жөніндегі жұмыс топтарының мүшесі болды. 2014 жылдың сәуір айынан бастап Kaspi банкінің атқарушы директоры болып табылады.
