19 наурызда жас жігіт Степногорск қаласында тұратын 89 жастағы қарияға қоңырау соғып, өзін полиция қызметкері ретінде таныстырған. Қарияның немересі жол-көлік апатын жасағанын, енді бес жылға сотталып кетпес үшін 18 мың доллар қажет екенін айтқан, деп жазады Qazaq.today ақпарат порталы.
Немересі үшін алаңдаған зейнеткер алаяқтарға өзінде тек 8 мың АҚШ доллары бар екенін айтқан. Кейін осы қаражатты, қосымша тағы 100 мың теңгені пакетке салып, такси жүргізушісі арқылы беріп жіберген.
Қылмыс жайлы білмеген такси жүргізушісі ол пакетті Көкшетауға әкеліп, курьерге берген.
Полиция қызметкерлері жедел-іздестіру шараларын жүргізіп, 22 жастағы курьерді ұстады.
Ол алған ақшасын куратор көрсеткен шотқа аударып үлгермей, такси қызметтері мен жеке қажеттіліктеріне 27 000 теңге жұмсаған.
27 наурызда ақша заңды иесіне қолма-қол қайтарылды.
Қазір алаяқтық фактісі бойынша сотқа дейінгі тергеу жүріп жатыр.
