Фото: видеодан скрин
Қоғамда әйел мен бала тағдыры туралы үнсіз қалған оқиғалар аз емес. Бірақ кейде үнсіздік бұзылады — бір ананың көз жасы мың адамның жүрегін ауыртады, деп хабарлайды Qazaq Today ақпарат порталы.
Жас әйелдің айтуынша, ол бұрынғы күйеуімен баласының заттарын бөлісу кезінде соққы мен қорлық көрген. Оқиға оның шәкірттерінің көзінше болған.
«Мен қарсы болдым, баламның заттарын бергім келмеді. Сол сәтте ол адамдардың көзінше мені қорлай бастады. “Жындысың, өтірікшісің, алаяқсың” деп айқайлады. Сосын: “Нағыз түріңді көрсетші, адамдар сенің қандай екеніңді көрсін”, – деді», — дейді әйел.
Бірнеше рет сабыр сақтауға тырысқанымен, эмоциясын тежей алмапты.
«Мен оған: “Мені ашуландырма” дедім. Бірақ ол тоқтамады. Қайта-қайта арандатты. Ақыры бір сәтте менің төзімім таусылды. Айқайлап жібердім. Біз төбелесіп қалдық. Ол күшпен баламның заттарын тартып әкетті», — деп еске алады ол.
Жылаған күйі үйіне оралған әйелді анасы қарсы алған. Ал анасының денсаулығы да ауыр екен.
«Мама оған хабарласқан екен. Ол болса: “Сіз балаға дұрыс қарамайсыз” деп жауап беріпті. Сонда анам: “Мен науқаспын, үшінші сатыдағы қатерлі ісікпен күресіп жүрмін, бірақ бәрібір сіздің балаңызға қараймын”, – деп жауап берген», — дейді кейіпкер көз жасын тыя алмай.
Бұл жағдай қоғамда жиі кездесетін, бірақ көп жағдайда жария етілмейтін тұрмыстық зорлықтың көрінісі. Психологтар мұндай оқиғалардың ең ауыр зардабы – баланың психологиялық жарақаты екенін айтады.
Қазір әйел құқық қорғау органдарына жүгінуді ойластырып жүр. Ол өз оқиғасын бөлісіп, осындай жағдайға тап болған өзге әйелдер үнсіз қалмаса екен дейді.
«Мен бұл туралы айтуға қорықпаймын. Себебі үндемесем, ол тағы бір әйелге дәл осылай жасайды», — дейді ол.
