Фото: vox populi.kz
#НеМолчиKZ қорының жетекшісі Дина Таңсәріні Қазақстанның заң органдары алты бап бойынша іздеп жатыр, деп хабарлайды Qazaq.today.
Бас прокурордың орынбасары Ғалымжан Қойгелдиев мәжіліс кулуарында журналистерге қоғам белсендісін іздеп табу бойынша жүргізіліп жатқан жұмыстар жайлы айтты.
«Дина Таңсәрі Смаилованы алты бап бойынша іздеп жатырмыз. Көбісі алаяқтыққа қатысты. Қазіргі таңда оның қайда екені анықталып жатыр. Анықталған бойда экстрадициялық материалдарды жібереміз», — деді Ғалымжан Қойгелдиев.
ІІМ Дина Таңсәріге қатысты тергеудің жүріп жатқаны жайлы осыдан екі жыл бұрын мәлімдеді. Алматы қаласының, Шығыс Қазақстан және Алматы облыстарының полиция департаменттері Динара Смайыловаға (Таңсәрі) қатысты қылмыстық іс ашқан.
Қазақстандағы қыз-келіншектер мен балалардың зорлыққа ұшырауын мәлімдеп жүрген Смайылова 2021 жылдан бастап елден кетіп қалған. Шетелде тұрса да қоғам белсендісі жұмыстарын әлі күнге тоқтатпаған.
