Негізгі ҰБТ-ға өтініш қабылдау 12 сәуірде басталады, деп хабарлайды Qazaq Today ақпарат порталы.
Ғылым және жоғары білім министрлігінің хабарлауынша, 2025 жылғы негізгі ҰБТ-ға өтініштер 12-25 сәуір аралығында қабылданады. 12-18 сәуір аралығында бір рет, ал 19-25 сәуір аралығында бір немесе екі рет тапсыруға өтініш беруге болады.
Тестілеудің өзі 16 мамырда басталып, 5 шілдеге дейін жалғасады. Талапкерлер ҰБТ-ны екі рет тапсырып, ең жоғары жинаған ұпайымен грант конкурсына қатыса алады.
Өтініш беру үшін app.testcenter.kz сайтына немесе UTO.kz қосымшасына кіріп, тест тапсыратын күнді, уақытты және орынды таңдауға болады. Екі мүмкіндікте де бірдей бейіндік пәндер комбинациясы таңдалады.
Талапкерлерге дайындалуға көмектесу үшін әр пән бойынша тақырыптық талдау жасалады. Қаңтар және наурыз айларында тест тапсырғандар өз нәтижелеріне қарай қай тақырыптарды қайталау керектігін көре алады. Сонымен қатар онлайн байқау тесттері де бар.
ҰБТ форматы өзгерген жоқ:
• 3 міндетті пән, 2 бейіндік пән;
• барлығы 120 тапсырма;
• ең жоғары балл – 140;
• тестілеу уақыты – 4 сағат (ерекше қажеттіліктері бар оқушыларға қосымша 40 минут беріледі).
Тест кезінде калькулятор, химиялық элементтердің кестесі және тұздардың ерігіштік кестесі қолжетімді. Қағаз нұсқалары да беріледі. ҰБТ-дан кейін 30 минут ішінде апелляция беруге болады. Сертификат апелляциядан кейін жеке кабинетте көрсетіледі.
Шекті баллдар:
• Құқық және педагогика – кемінде 75 балл;
• Медицина – кемінде 70 балл;
• Ұлттық ЖОО – кемінде 65 балл;
• Басқа ЖОО – кемінде 50 балл. Тестілеу қауіпсіздігін сақтау үшін телефон, шпаргалка сияқты тыйым салынған заттарды алып кіруге болмайды. Аудиторияларда бейнебақылау жүргізіледі, ал тест аяқталғаннан кейін бейнежазбалар қаралып, ереже бұзушылық анықталса, нәтижелер жойылады.
