Фото: ©️ Tengrinews.kz / Алихан Сариев
Қазақстанда телефон нөмірлерін eGov арқылы беру туралы ұсыныс бар. Осы орайда алаяқтықтардың әрекетіне тосқауыл қою қадамдары тиімді болады. Бұл туралы ҚР Цифрлық даму, инновациялар және аэроғарыш өнеркәсібі вице-министрі Асхат Оразбек мәлім етті, деп хабарлайды Qazaq Today ақпарат порталы Kazinform-ға сілтеме жасап.
Бүгін Мәжілістің жалпы отырысында Асхат Рақымжанов Қазақстан халқы мәліметтерінің құпиялығын сақтау, алаяқтардан қорғау мәселесіне қатысты сұрақ қойды.
Өз кезегінде А. Оразбек министрлік SIM-карталарды сатуда тиісті шектеу енгізу жоспарланып отырғанын айтты.
«Алаяқтар негізінен WhatsApp және әлеуметтік желілер арқылы әрекет етеді, ал ұялы байланыс операторлары WhatsApp-ты бұғаттай алмайды. Қазіргі кезде операторлар SIM-карталар мен нөмірлерді беріп жатыр. Алайда болашақта азаматтар нөмірлерді Egov.kz порталы арқылы алады. Сонымен қатар, біз бір адамның қолында болатын SIM-карталардың санын шектейміз», — деді вице-министр.
Оның айтуынша, заңды тұлғалар жұмыс бабында пайдалануға сатып алатын SIM-карталарға қатысты нақты деректерді ұсынады. Себебі қазір нөмірлер бақылаусыз өткізіліп жатыр.
«Таяуда министрлік осындай заңнамалық бастамалармен Парламентке келеді», — деді Асхат Оразбек.
