Астана, Қазақстан (19 қараша 2024) — 1 желтоқсаннан бастап Қазақстанға шыққанына үш жыл толмаған көліктерді әкелу ережелері өзгереді. Бұл туралы Qazaq.today ақпарат агенттігі хабарлады.
Мемлекеттік кірістер комитетінің мәліметінше, енді 3 жыл толмаған автокөліктерді тек КТБ құжатында (Көлік түрін бекіту) ресми тізімі бар заңды тұлғалар ғана әкеле алады. Бұл құжат көлік құралының техникалық регламент талаптарына сәйкестігін растайды.
Бұрын кез келген адам КТБ арқылы автокөліктерді импорттай алатын. Жаңа ереже бойынша, импорт құқығы тек КТБ құжатында көрсетілген заңды тұлғаларға ғана беріледі.
Бұл өзгерістер Кедендік одақтың техникалық регламентіне сәйкес енгізілді және Қазақстанға автокөліктерді әкелуді оңтайландыруға бағытталған.
Айта кетейік, Алматыдағы табиғатты қорғау бекеттерінде жыл басынан бері 25 мың экологиялық нормаларды бұзу фактісі тіркелген. Автокөліктерге қатысты салынған айыппұл сомасы 437,4 млн теңгені құраған.
