Алматыда 20 қазанда Ауғанстаннан келген тауарлардың көрмесі ашылды. Бұл көрме туралы ақпарат алғаш рет тамыз айында ауғандық БАҚ-та жарияланды, бірақ көрменің ашылуы қазан айына дейін созылды. Көрмеге Ауғанстанның сауда және өнеркәсіп министрі Нуруддин Азизи және Қазақстанның Премьер-Министрінің орынбасары Серік Жұманғарин қатысты. Бұл туралы Qazaq.today сайты Orda-ға сілтеме жасап хабарлайды.
Көрме өткен жылы Астанада ұйымдастырылған болатын, ал биыл Алматыдағы «Атакент» көрме орталығында өтті. Бұл Қазақстанның «Талибан» қозғалысын террористік ұйымдар тізімінен шығарғаннан кейінгі алғашқы көрме болып табылады.
Көрмеге түрлі тауарлар ұсынылды: қолөнер бұйымдары, кілемдер, дәстүрлі киімдер, әшекейлер, құрғақ жемістер, тәттілер, және сусындар. Әсіресе, тегін ұсынылған «Золотая жизнь» сусынына келушілердің қызығушылығы жоғары болды.
Ауғанстанның дәстүрлі тағамдары мен сусындары, оның ішінде шафраннан жасалған шай да көрме қонақтарына ұсынылды. Бұл шайдың бағасы жоғары болса да, сатушылар оның табиғилығы мен сапасының жоғарылығын ерекше атап өтті.
Сонымен қатар, көрмеде ауғандық шойын қазандар мен самауырлар, құрылыс материалдары, мрамор үлгілері ұсынылды. Ауған мраморы әлемдік сапаға ие және көптеген елдерге, соның ішінде Сауд Арабиясы, Түркия және Үндістанға экспортталады.
Көрменің ең ерекше бөлімі — антиквариат сөресі болды. Мұнда ежелгі заттар мен қару-жарақтар, соның ішінде қылыштар, қанжарлар, және кремньдік мылтықтар сатылымға шығарылды.
Көрме 22 қазанға дейін жалғасады, ал сол күні Қазақстан-Ауғанстан бизнес-форумы өтеді.
