Фото: mk.ru

Грузияда шерушілер мен полиция арасында орын алған қақтығыстан қырыққа жуық адам ауыр жарақат алды. Халық пен билік арасындағы жағдайдың ушығып кеткеніне төртінші күн. Түнде де тоқтамаған шеру кезінде 200-ден астам адам тұтқындалған, деп хабарлайды Qazaq.today.

Ria.ru мәліметінше, Тбилисидегі парламент ғимаратының алдында полицияға тас лақтырып, пиротехникалық заттарды қолданған шетелдік те ұсталған. Жергілікті БАҚ наразылық білдірушілер парламент ғимаратының алдындағы қоршауларды қағып, пиротехникалық құралдарды пайдаланып жатқанын хабарлады. Парламент ғимаратын қорғау үшін қауіпсіздік күштері мен арнайы жасақтар жұмылдырылды. Парламент ғимаратының алдында мыңдаған адам әлі шерулетіп, ұрандатып тұр. Оқиға орнында су атқыштар пайдаланылып, наразылық білдірушілер баррикадалар тұрғыза бастаған. РИА Новости агенттігінің хабарлауынша, осы сағатқа дейін 200-ден астам адам ұсталған. Тұтқындалғандар арасында кәмелетке толмағандар, әйелдер, журналистер, мәдениет саласының өкілдері мен үкіметтік емес ұйымдардың қызметкерлері бар.

Тбилисидегі митинг кезінде зардап шеккендердің 40-қа жуығы өткен түнде ауруханаларға жеткізілді, олардың арасында демонстранттармен салыстырғанда ауыр жарақат алған полиция қызметкерлері бар, деді Грузия Денсаулық сақтау министрлігінің басшысы Михаил Сарджвеладзе.

«Қазіргі уақытта өткен түнде емханаларға 37 адам жеткізілді. Оның 24-і наразылық білдірушілер, 12-сі полиция қызметкерлері. Полицейлер алған жарақаттар өте ауыр, олардың жарақаттары азаматтарға қарағанда көбірек. Полиция қызметкерлері ауыр металл заттарды лақтыру салдарынан жарақат алды», — деді министр брифингте.

Оппозициялық наразылықтардың кезекті сериясы Грузияда бейсенбіде Премьер-министр Ираклий Кобахидзе елдің Еуропалық одаққа мүшелігі туралы келіссөздерді 2028 жылға дейін тоқтату туралы шешім қабылдағаннан кейін басталды.

Еуроодаққа қосылу туралы құжатты қарау тоқтатылған соң шеру Грузияның 8 қаласында жалғасып келеді.

Фото: qafqazinfo.az

Таяу Шығыс тағыда отқа оранды. Қаны қата бастаған ескі жараның аузы ашылып, адам қаны судай ағып жатыр. Аяқ астынан қайта тұтанған соғысты бастаушылардың мүддесі де, әскери тактикалары да әлем назарын аудартты, деп хабарлайды Qazaq.today порталы.

Сирияның Асад режиміне қарсы антиүкіметтік әскери құрылымдары ұрысқа шықты. «Хаят Тахрир аш-Шам» тобын өзге де мүдделі ұйымдар қолдап, Асад режиміне қарсы соғысты бастап жіберді. Мақсаты, Асад режимін құлату. Асадтың қос жақтаушысы — Иран мен Ресей өзге соғыстармен әлек боп жатқан тұсты ұтымды пайдаға жарату.

Ұрыс Сирияның ірі, әрі көне шаһарларының бірі саналатын Алепподан басталған. Қазір антиүкіметтік топтар әскері ентелеп басып, екпіндеп соғып келеді. Қазірге дейін ондаған елдімекенді, бірсыпыра маңызды ұрыс позицияларын, стратегиялық нүктелерді бағындырған. Тіпті, Алеппо мен Дамашықты жалғайтын жол да Асадқа қарсы күштердің бақылауына өткен.

Бұл Сирияда тұтанып жатқан 2020 жылдан бергі алғашқы ауқымды ұрыс. Асад әскері ұйқыда, қозғалысы тым сылбыр. Кей позициялардан тым-тырақай қашып жатқаны да жария болып үлгерді. Қысқасы — қарсыласуға мүлде қауқарсыз күйде екендіктерін көрсетуде. Ал антиүкіметтік күштер әскері қарқын үстіне қарқын қосуда.

Осы ұрыстар кезінде Асад армиясы жағында жүрген Ирандық ИРСК генералы, Асад армиясының әскери кеңесшісі — Киюмарс Пурхашемидің көзі жойылған.

Ал Сирия басшысы Башар Асад едел-жедел Мәскеуге ұшып кеткен. Көмек сұрау үшін, кеңес тыңдау үшін. Әрине бұл ұзынқұлақтың әңгімесі.

Антиүкіметтік күштердің әскер бастап, ұрысқа шығуына басты себептердің бірсыпырасы мынау:

1) Израильдің «Хезболланы» талқандауы һәм Сирия жақтағы Иран проксилерінің Израильден соққы жеп, әлісіреуі;

2) Ресей аймақтағы өз әскерінің едәуір бөлігін Сириядан алып кетіп, Украина майданына салуы.

Маңызды: Осы шайқастар кезінде Асад режимін қорғаушы «Вагнер» ЖӘК-тің оншақты жалдамалы жендетінің көзі жойылған. Асадқа қарсы әскер Ресей қарулары мен техникаларын олжалаған.

Антиүкіметтік жасақтар өздеріне бағындырылған аумақтарды Асад портреттері мен Ресей символикаларынан тазарта бастаған.

«Асад режимін қолдаушы Ресей мен Иран біздің дұшпанымыз», — дейді антиүкіметтік күштер.

Айта кетейік, Түркия Асад режиміне қарсы күресуші құрылымдардың кейбірін ашық, кейбірін жасырын қолдайды. Олар Түркияның проксилері саналады. Осы шайқасқа техникалық көмекті де Түркия ұсынған. Жалпы Ердоған Сирия мен Ливиядағы проксилері арқылы Путиннің жүйкесіне тиер әрекеттер жасап тұратыны тағы факт.

Қазір Алеппоның батысы түркияшыл күштердің бақылауында. 48 сағаттың ішінде Башар Асад 50-ден астам елдімекенді және 15 әскери блок-бекеттерін жоғалтқан. Негізінен Сирия мен Түркия шекарасында тұратын түркімендерден тұратын көтерілісшілердің шабуылшы бригадалары Тель-Рифат пен Алеппо бағытында күрделі операция жүргізу үшін жөнелтілді. Сирия оппозициясының шабуылының ауқымы өсуде. Алдыңғы қатарлы жасақтар Алеппоның батысын бақылауда.

Қазір Түркия қолдап отырған Сирия ұлттық армиясы (СҰА) Таль-Рифааттың солтүстігінде ауыр бронетехника мен жауынгерлерді жинап, қаланы АҚШ қолдап отырған КЖП лаңкестік ұйымынан тазартуға дайындалуда.

Түрлі дереккөздердің хабарлауынша, барлық СҰА топтары Алеппо қаласына шабуыл жасау операциясын қолдаған. Осылайша, СҰА Түркияның артиллериялық қолдауымен Асад режимінің күштеріне қарсы екінші майдан ашты.

Ал ресейлік арнайы жасақ Менаг авиабазасынан, Тель-Рифат пен Алеппо қаласынан эвакуацияланды. Сирия президенті Башар Асадты Ресейден басқа, Иран мен оған одақтас содырлар, соның ішінде ливандық «Хезболла» қолдайды.

Ақпарат көзі; Abai.kz