Фото: www.obk.kz
Сотталған экс-ұлттық экономика министрі Қуандық Бишимбаевтың бұрынғы жары Назым Кахарман алимент дауына қатысты мәлімдеме жасады. Оның айтуынша, балалардың әкесі алимент төлеу міндетінен жалтаруға тағы да әрекет еткен.
Бұл туралы Qazaq.today порталы хабарлайды.
Назым Кахарманның сөзінше, Бишимбаев алимент мөлшерін азайтуды талап етіп, сотқа талап-арыз түсірген. Қорғау тарабының уәжі – «алименттік келісім бойынша төлеуге мүмкіндігі жоқ» дегенге саяды.
Кахарман алименттік келісімнің заңдық күші жоғары екенін айтып, оны «жай ғана ойдан айнып, тоқтата салуға болмайтынын» жеткізді. Оның сөзінше, мұндай құжат ең алдымен балалардың мүддесін қорғайды.
Тараптардың уәжі және соттың ұстанымы
Кахарманның айтуынша, оның адвокаттары Бишимбаевтың қаржылық мүмкіндігі бар екенін құжатпен дәлелдеген. Ол «тағы 15 жыл алимент төлеуге шамасы жетеді» деп мәлімдеді.
Сондай-ақ ол сотқа дейін Бишимбаев бірнеше жылжымайтын мүлікті кәмелет жасына толған үлкен ұлының атына рәсімдеп жібергенін айтады. Назымның сөзінше, ұлы «жақында 26-ға толады», ал мұндағы мақсат – кәмелетке толмаған балаларға төленетін алименттен жалтару.
Нәтижесінде сот алиментті азайту туралы талапты қанағаттандырмай, алименттік келісім шарттарын орындауды міндеттеген.
Бұған дейін де талпыныс болған
Назым Кахарман Бишимбаевтың алиментті қысқартуға бұған дейін де әрекет жасап көргенін, бірақ ол жолы да нәтижеге жете алмағанын айтты.
Ол экс-министрдің өзін-өзі «құлдыратпағанында», бүгінде әлдеқайда ауқатты болуы мүмкін екенін де қоса кетті. Айтуынша, ондай жағдайда алименттік келісімнің өзі Бишимбаевты да қорғайтын еді, яғни бұрын келісілген мөлшерден артығын талап ету қиындайтын.
Мәліметке сәйкес, видео Назым Кахарманның Instagram парақшасында жарияланған.
