Фото: видеодан скрин
Мекке қаласында орналасқан ислам әлемі үшін аса қасиетті орын — Масжид әл-Харам аумағында жұртты алаңдатқан жағдай орын алды. Алдын ала деректерге сүйенсек, белгісіз ер адам мешіттің жоғары қабаттарының бірінде өз өміріне қауіп төндіретін әрекетке барған. Бұл туралы Qazaq Today ақпарат порталы хабарлады.
Оқиға туралы ақпарат түсе салысымен, қауіпсіздік қызметінің өкілдері жедел түрде жетіп, азаматты тоқтатуға тырысқан. Сауд Арабиясы Ішкі істер министрлігі таратқан мәліметке сәйкес, араласу кезінде әлгі адам мен оны құтқаруға ұмтылған қауіпсіздік қызметкері түрлі деңгейде жарақат алған. Құлау қаупі туындаған сәтте тәртіп сақшылары оны ұстап қалуға әрекет жасаған.
Қазіргі уақытта зардап шеккен екі азамат та медициналық мекемеде дәрігерлердің бақылауында. Дәрігерлер олардың өміріне тікелей қауіп төніп тұрмағанын мәлімдеді.
Ресми органдар оқиға орнында барлық тиісті шаралар толық жүргізілгенін, жағдайдың бақылауға алынғанын хабарлады. Қасиетті мешіттегі құлшылық тәртібі бұзылған жоқ, алайда қауіпсіздік талаптары уақытша күшейтілді.
Бұл оқиға қоғамда қызу пікірталас тудырды. Осыған орай Масжид әл-Харамның бас имамы қажылар мен зиярат етушілерді сабыр сақтауға, тәртіп пен қауіпсіздік ережелерін қатаң ұстануға шақырды. Ол ислам дінінде адам өмірінің ең жоғары құндылық екеніне ерекше тоқталып, қандай жағдай болмасын оған қиянат жасауға болмайтынын еске салды.
Қазіргі таңда құзырлы органдар оқиғаның барлық мән-жайын жан-жақты зерттеп жатыр. Қосымша ресми ақпараттың кейінірек жарияланатыны хабарланды.
