Шығыс Қазақстан облысындағы жолдардың бірі тағы да қанға боялды. Демалыс күні болған жантүршігерлік жол апаты бір сәтте үш адамның өмірін қиып кетті. Полиция оқиғаның мән-жайын анықтап жатыр.
Қайғылы жағдай 7 желтоқсан күні «Шемонаиха – Усть-Таловка» республикалық маңызы бар тас жолының 7-ші шақырымында орын алған. Екі шетелдік көліктің бетпе-бет келуі орны толмас қасіретке ұласты.
Темір тұлпарлар соқтығысы
ШҚО Полиция департаментінің мәліметінше, жолда Toyota Corona Premio және Toyota Hilux маркалы автокөліктері соқтығысқан. Соққының қатты болғаны соншалық, жеңіл көлік адам танымастай күйге түскен.
Апат салдарынан Toyota Corona Premio көлігінің жүргізушісі мен оның жанында болған екі жолаушы алған ауыр жарақаттарынан оқиға орнында көз жұмды. Жедел жәрдем қызметкерлері келгенде, олардың жүрегі тоқтап қалған еді.
Тергеу және ескерту
Қазіргі уақытта аталған дерек бойынша сотқа дейінгі тергеу амалдары басталды. Сараптамалар тағайындалып, апаттың нақты себептері анықталуда.
«Құрметті жүргізушілер! Жол қателікті кешірмейді. Әсіресе қыс мезгілінде жол тайғақ, көріну қашықтығы нашар болуы мүмкін. Өз өміріңіз бен өзгелердің қауіпсіздігі үшін жылдамдықты асырмауды және жол ережесін қатаң сақтауды сұраймыз», – деді полиция өкілдері.
Мамандар қысқы жолда барынша сақ болып, қашықтықты сақтау керектігін ескертеді.
Фото: Виедаодан кадр
