Фото: Мәжіліс
Мемлекеттік сатып алу саласының сарапшысы Бибек Жүнісов білім беру жүйесіндегі ұзақ жылдардан бері шешілмей тұрған мәселені қайта көтерді. Оның айтуынша, мектептерге А4 қағаз, картридж, принтер, бор секілді қарапайым кеңсе тауарларын алуға жыл сайын 250 млрд теңге бөлінсе де, мұғалімдердің басым бөлігі бұл заттардың өздеріне жетпейтінін айтып шағымданады, деп хабарлайды Qazaq Today ақпарат порталы.
Сарапшы бұл — бұрыннан қалыптасқан жүйелік проблема екенін атап өтеді. Қарапайым құрал — жабдықтардың сыныптарға жетпеуі салдарынан ұстаздар күнделікті жұмысын өз қалтасынан төлеп атқарып отыр.
Жүнісов мәселенің нақты шешімін де ұсынды: кеңсе тауарларына бөлінетін қаржыны тендер арқылы бөлу моделін өзгертіп, әр мұғалімнің айлығына үстеме ретінде қосып беруді тиімді деп санайды. “Ақша тікелей ұстаздың қолына барса, жауапкершілік те, ашықтық та артады. Сонда қағаз да, бор да өз уақытында болады”, — дейді сарапшы.
Білім саласындағы миллиардтардың тиімді жұмсалуы жөніндегі бұл бастама қоғамда жаңа пікірталас тудыруы мүмкін. Осы мәселеге Оқу-ағарту министрі Жұлдыз Сүлейменова жауап берді.
