Фото: Алтынай Сағындықова/Kazinform
Қазақстандағы 600 мыңға жуық педагогтің басты бас ауруына айналған аттестаттау жүйесі жақын арада өзгеруі мүмкін. Оқу-ағарту министрі Жұлдыз Сүлейменова елордада өткен жиында мұғалімдерді толғандырған ең өткір сұрақтарға жауап берді.
Магистрлерге жеңілдік бола ма?
Ауыл әкімдерімен өткен диалог алаңында қызу талқыланған мәселенің бірі – магистратура бітірген жас мамандарға қатысты болды. Ұсыныс бойынша, магистр дипломы бар мұғалімдерге біліктілік санатын автоматты түрде (емтихансыз) беру сұралған еді.
Алайда, министр бұл бастаманы қолдамайтынын ашық айтты. Оның сөзінше, «қызыл диплом» немесе ғылыми дәреже – мұғалімнің балаға сапалы білім бере алатынына кепілдік емес.
«Мен бұл ұсынысқа қарсымын. Орта білім жүйесінде мұғалімнің біліктілігі қағаз жүзіндегі дәрежемен емес, оның сабақ берудегі нақты кәсіби шеберлігімен бағалануы тиіс», — деп кесіп айтты Жұлдыз Сүлейменова.
«Авторлық бағдарлама» дауы
Соңғы кездері ұстаздар қауымында «педагог-зерттеуші» санатын алу үшін талап етілетін авторлық бағдарлама жазу мәселесі үлкен дау тудырған болатын. Көпшілік бұл талаптың тым күрделі әрі формальды екенін айтып шағымданған.
Министр бұл мәселеден хабардар екенін және қазіргі таңда аттестаттау қағидалары педагогтердің ұсыныс-пікірлері негізінде қайта қаралып жатқанын жеткізді. Мемлекет басшысының тапсырмасына сай, енгізілетін өзгерістер мұғалімдерді қолдауға және артық қағазбастылықтан арылтуға бағытталмақ.
Ауыл мектептері назарда
Жиын барысында шағын жинақты ауыл мектептерінің тағдыры да сөз болды. Министрлік ауылдық жердегі білім сапасын көтеру үшін арнайы шаралар қабылдайтынын мәлімдеді.
Бұл ретте ауылға білікті мамандарды тарту және оларды әлеуметтік жағынан қолдау жұмыстары күшейтілмек. Естеріңізге сала кетейік, қазір министрлікке ұстаздар тарапынан аттестацияны жеңілдету немесе өзгерту туралы мыңдаған өтініш түсіп жатыр.
