Джуди мен Ник қайта оралды: «Аңдар шаһары 2» қазақша прокатқа шықты

Бүгіннен бастап, яғни 27 қарашадан еліміздің барлық кинотеатрларында Disney студиясының көптен күткен «Аңдар шаһары 2» анимациялық фильмі көрсетіле бастады. Бұл жолы сүйікті кейіпкерлеріміз өз ана тілімізде сөйлейді.

Кеше Алматы төрінде осы туындының жабық көрсетілімі өтіп, оған зиялы қауым өкілдері, танымал блогерлер мен БАҚ өкілдері арнайы қатысты. Бұл тек кино әлеміндегі жаңалық емес, қазақ тілінің контент нарығындағы тағы бір ірі жеңісі деуге болады.

Жұлдызды құрам: Кейіпкерлерді кімдер дыбыстады?

Фильмнің қазақша нұсқасы сапасы жағынан түпнұсқадан еш кем түспейді. Дубляжға еліміздің ең танымал театр және кино жұлдыздары атсалысқан.

Мәселен, басты кейіпкер – ширақ қоян Джуди Хоппсты актриса әрі әнші Сабира Жарасқызы дыбыстаса, айлакер түлкі Ник Уайлдқа тән харизманы дауыс арқылы жеткізу міндеті жүктелген.

Ал қатал полиция бастығы Богоны (Капитан Буйволсон) актер Асан Мәжит, беделді Дәу Мырзаны (Мистер Биг) Еркебұлан Дайыров өз дауыстарымен әрлендірді. Сондай-ақ, Милтон Рыcевич есімді кейіпкерді актер Бақытжан Әлпейіс дыбыстады.

Disney және қазақ тілі: Жаңа деңгей

Халықаралық «Қазақ тілі» қоғамының мәліметінше, бұл – биылдың өзінде қазақшаланған Disney-дің төртінші фильмі. Бұған дейін көрермендер «Ойжұмбақ 2», «Моана 2» және «Муфаса: Арыстан патша» туындыларын ана тілімізде тамашалаған болатын.

Сонымен қатар, биылғы қоржында «Ақшақар», «Лило мен Стич» және «Элио» сияқты жобалар да бар.

Халықаралық «Қазақ тілі» қоғамының президенті Рауан Кенжеханұлының айтуынша, мұндай жобалар тіліміздің тынысын кеңейтеді:

«Әлемдік деңгейдегі контентті қазақша тамашалау қалыпты әрі тамаша дәстүрге айналып келеді. «Аңдар шаһары» әлемнің 40-қа жуық тіліне аударылса, соның ішінде қазақ тілі де ірі тілдермен иық тірестіріп тұр. Бұл – қоғамымыздың мәдени талғамы мен тілге деген жаңа көзқарасының жемісі».

Фильм не туралы?

Екінші бөлімде детективтер Джуди Хоппс пен Ник Уайлд жаңа әрі қауіпті іспен бетпе-бет келеді. Аңдар шаһарының тыныштығын бұзып, астаң-кестеңін шығарған жұмбақ рептилия пайда болады.

Қылмыскердің ізіне түсу үшін қос серіктес бүркемеленіп жұмыс істеуге мәжбүр. Оларды алда бұрын-соңды болмаған қызықты да қиын сынақтар күтіп тұр.