Мемлекет басшысы Қасым-Жомарт Тоқаев Қазақстан Республикасының «Жасанды интеллект туралы» заңына қол қойды. Бұл туралы Ақорданың баспасөз қызметі хабарлады. Жаңа заң жасанды интеллект (ЖИ) саласын реттеудің негізгі қағидаттарын, меншік иелерінің жауапкершілігін және ұлттық платформа құруды көздейді.
Бұл құжат Қазақстандағы жасанды интеллект технологияларының дамуы мен қолданылуына елеулі өзгерістер енгізбек. Заңның толық мәтіні ресми баспасөзде жарияланады.
Заңның негізгі қағидаттары қандай?
Жаңа заң жасанды интеллект жүйелері қызметінің іргелі қағидаттарын бекітеді. Енді жасанды интеллект адамның белгілі бір міндеттерді орындауына арналған құрал, яғни ақпараттандыру нысаны ретінде анықталды.
Заң жұмысының негізіне мынадай қағидаттар алынды:
-
Заңдылық, әділеттілік және теңдік;
-
Ашықтық пен түсініктілік;
-
Адам игілігіне және оның шешім қабылдау еркіндігіне басымдық беру;
-
Деректерді қорғау және құпиялылық;
-
Қауіпсіздік пен қорғаныс.
Жасанды интеллект үшін кім жауап береді?
Заңда жауапкершілік және бақылау қағидаттарына ерекше назар аударылған. Бұдан былай жасанды интеллект жүйелерінің меншік иелері мен пайдаланушылары оны қолдану кезінде атқаратын рөліне қарай жауапты болады.
Оларға келесі негізгі міндеттер жүктеледі:
-
Тәуекелдерді басқару;
-
Жүйенің қауіпсіздігі мен сенімділігін қамтамасыз ету;
-
Пайдаланушыларға техникалық қолдау көрсету.
Қандай ЖИ жүйелеріне тыйым салынады және тауарлар қалай таңбаланады?
Азаматтардың құқықтарын қорғау және құқықтық тәртіпті қамтамасыз ету мақсатында Қазақстан аумағында бірқатар қауіпті ЖИ жүйелерін құруға және пайдалануға тыйым салынады.
Тыйым салынған жүйелерге мыналар жатады:
-
Адамның түпсанасына әсер ететін (манипуляциялық) жүйелер;
-
Жеке деректер туралы заңнаманы бұза отырып, ақпарат жинайтын және өңдейтін жүйелер.
Сонымен қатар, маңызды жаңалық – жасанды интеллектінің көмегімен жасалған тауарлар, жұмыстар немесе қызметтер міндетті түрде таңбалануы тиіс. Бұл тұтынушылардың таңдау жасау кезінде толық ақпарат алуын қамтамасыз етеді.
«Ұлттық жасанды интеллект платформасы» құрылады
Заң әлемдік тәжірибені ескере отырып, «Ұлттық жасанды интеллект платформасының» қызметіне құқықтық негіз қалайды.
Бұл платформаның негізгі мақсаты – саланы үдемелі дамыту. Ол бағдарламалық өнімдерді, жасанды интеллект моделдерін шектеулі мерзім ішінде әзірлеуге, оқытуға және сынақтан өткізуге арналған орталықтандырылған алаң болады.
