Фото: Видеодан скрин
Семейде нан өнімдерінен тышқанның жүніне ұқсайтын зат табылған соң, мектеп асханасы жабылды. Ата-аналардың шағымынан кейін асхана тексеріліп, кәсіпкерге санитарлық ережелерді бұзғаны үшін 600 000 теңгеден астам айыппұл салынды, деп хабарлайды Qazaq Today ақпарат агенттігі КТК арнасына сілтеме жасап.
Кәсіпкер бұзушылықтарды түзетіп, жаңа жұмыс істеуге рұқсат алғанша асхана жабылады. Бір қызығы, мектептің өзі де, оның асханасы да қыркүйек айында ғана ашылған.
“Анықталған құқықбұзушылықтар үшін жеке кәсіпкерге Әкімшілік құқық бұзушылық туралы кодекстің 425-бабы (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша хаттама толтырылды. Сонымен қатар, кәсіпкердің мектеп асханасындағы қызметін уақытша тоқтату туралы жедел әрекет ету шараларын қолдану жөнінде қаулы шығарылды”, – деді Семей қалалық санитарлық-эпидемиологиялық бақылау бөлімінің басшысы Шыңғыс Чокушев.
