Фото: Видеодан алынған кадр
Орал қаласында тұрғындардың сабыры таусылды. Қала орталығындағы Деповская көшесі жабылған соң, барлық көлік ағымы Школьная көшесіне бағытталды. Бірақ онда ешқашан асфальт болмаған. Шұңқырлары тізеден, шаңы көз аштырмайды. Көлік көптігі мен жолдың жағдайы қазір қала халқы үшін күнделікті қасіретке айналған, деп жазады Qazaq Today ақпарат порталы.
Жергілікті жұрт жылдар бойы әкімдікке жазып келеді. «Асфальт салыңдар» деген талапқа жауап біреу ғана: «қаржы жоқ». Ал осы уақытқа дейін ең болмаса су шашып, шаңды басатын арнайы көлікті шығару да ұйымдастырылмаған. Халықтың айтуынша, әкімдікке қоңырау шалса, телефон көтерілмейді, жауап беретін адам жоқ.
«Бәрі бір-біріне сілтейді. Бірде ана көшені жабады, бірде мына көшені. Белгі жоқ, адамдар қайда бұрылуды білмей, жолдың үстінде әлекке түсіп жүр. Қала ортасында отырып, әлі күнге дейін асфальт көрмегеніміз ұят», – дейді тұрғындар.
Әкімдік өкілдері «қаржы жоқ» деген сылтауды айта берсе, қарапайым халық шаң жұтып, ойықтан-ойыққа секіріп жүре бермек пе? Қаланың дамуы тек қағаздағы есепте бар да, халықтың өмір сапасында жоқ екені тағы бір мәрте дәлелденді.
