Фото: Видеодан алынған кадр
Халықтың ашуын тудырған мәселе
Атырау қаласының Привокзальный ықшамауданында тұрғындардың мазасын қашырған мәселе бірнеше аптадан бері шешілмей тұр. 3А шағынауданындағы көпқабатты үйлердің қасында орналасқан темір дүңгіршекте шикі балық сатылып жатыр. Әуелде тұрғындар «жеке кәсіпкердің шаруасы шығар» деп мән бермеген. Бірақ күн ысыған сайын балықтың сасыған иісі үйлерге кіріп, адамдардың төзімі таусылды, деп хабарлайды Qazaq Today ақпарат порталы.
Санитарияға сай ма, жоқ па?
Жергілікті халықтың айтуынша, бұл сауда орны ешқандай санитарлық талапқа сай емес. «Мұнда тоңазытқыш жоқ, үстел-орындықтың өзі антисанитария. Ит пен мысық жүрген жерде ашық-шашық балық сатады. Біз талай рет әкімдікке де, санитарлық мекемелерге де шағымдандық. Бірақ нәтиже жоқ», – дейді тұрғындар.
Рустем Баязиев есімді белсенді азамат Instagram-да мәселені бірнеше рет көтерген. «10 күн бұрын ресми арыз жаздық, дәлел ретінде видео мен фотоларды тіркедік. Бірақ ешқандай жауап жоқ. Тағы да таныс-тамыр ма?» – деп сұрайды ол.
Әкімдік пен санитарлық бақылау қайда қарап отыр?
Тұрғындар наразылығын ашық білдіруде. «Неге заңды шара қолданбайды? Санэпидемстанция мен әкімдік халықтың үнін естімей ме?» деген сұрақ қоғамда қызу талқыға түсті.
Кейбір пікір иелері тіпті «рұқсат берген әкімнің өзі жауапқа тартылуы керек» дейді. «Әкімдіктің адамы болмаса, бұлайша көз жұма қарамас еді. Халыққа иіс сасып отырған дүңгіршек керек пе, әлде пара алған шенеуніктердің қалтасы ма?» деген ашулы сөздер жазылуда.
Халық пен билік арасындағы сенім дағдарысы
Бұл оқиға қарапайым тұрғындардың билікке деген сенімінің тағы да шайқалғанын көрсетті. «Балық сасып қана тұрған жоқ, халықтың шыдамы да шіріп барады», – дейді бір пікір иесі.
Атырау жұрты ашық сұрақ қойып отыр:
Санитарлық талапты бұзып отырған сауда орны неге әлі жабылған жоқ?
Неге жазылған арыздар қараусыз қалуда?
Билік халықтың денсаулығынан гөрі басқа мүддені ойлап отыр ма?
Халықтың талабын елемеу — үлкен қателік. Бір қарағанда ұсақ мәселе болып көрінетін «балық дауы» шын мәнінде биліктің халықпен байланысының әлсіздігін көрсетіп тұр. Егер уақтылы шешілмесе, бұл тек Атыраудың ғана емес, бүкіл елдің сеніміне сызат түсірмек.
Посмотреть эту публикацию в Instagram
