Астана қаласында іске асырылып жатқан JOLTAP жобасы тұрғындарға табысын арттырып, жаңа кәсіп бастауға және сұранысқа ие мамандықтарды меңгеруге нақты мүмкіндік беруде. Осы бағдарламаның сәтті қатысушысы — тігін шебері Алтынай Мұқанова өз тәжірибесімен бөлісті, деп хабарлайды қала әкімдігінің ресми сайты.
20 жылдық тәжірибесі бар кәсіпкер
Алтынай 20 жылдан бері тігін өндірісімен айналысады. Оның жеке шеберханасында үйге арналған тоқыма бұйымдары – көрпе, перде, дастархан, майлық және өзге де өнімдер тігіледі. Ұзақ уақыт бойы ол өз кәсібін офлайн форматта дамытып келген. Алайда заманауи нарық талабына сай, Kaspi дүкені арқылы онлайн сауданы қолға алғысы келген.
“JOLTAP жобасы туралы алғаш рет тренингтен өткен досымнан естідім. Жобаға қатысып көруге бел будым және бұл шешіміме еш өкінбеймін. Шынымен де даму үшін үлкен мүмкіндік”, – дейді Алтынай.
Онлайн сауда мен маркетинг дағдыларын меңгеру
Жоба аясында Алтынай Kaspi платформасында онлайн сауданы ұйымдастыру бойынша оқудан өтті. Тренинг барысында оған:
-
маркетинг негіздері,
-
өнімге арналған сапалы фотосурет түсіру,
-
өнім картасын жасау,
-
баға саясатын белгілеу,
-
Kaspi платформасында жұмыс істеу жолдары үйретілді.
Сонымен қатар ол сән дизайны бойынша да қосымша білім алып, бұрын тек тігіп келген өнімдеріне енді дизайн жасау мен қию технологиясын кәсіби деңгейде қолдана бастады. Бұл оған өнім түрлерін көбейтуге жол ашты.
Жаңа белестер мен жеке даму
“Мен үшін ең үлкен кедергі – өзімді көпшілікке таныстыру және әлеуметтік желілерде белсенді болу еді. Өзім қарапайым адаммын. Бірақ жобадағы тәлімгерлер мен басқа қатысушылардың қолдауы маған сенімділік берді”, – дейді Алтынай.
Қазіргі таңда Алтынай Kaspi желісінде жеке онлайн дүкенін ашып, алғашқы тапсырыстарын орындап та үлгерді.
“JOLTAP жобасы менің өмірімде серпіліс әкелді. Бұл тек білім емес, сонымен қатар мотивация, қолдау және өз күшіңе деген сенімділік. Осындай пайдалы бастама үшін ұйымдастырушыларға шын жүректен алғысымды білдіремін”, – деп түйіндеді кәсіпкер.
