Америка Құрама Штаттарының Қазақстандағы Бас консулы Кэролайн Сэвидж Алматыда журналистермен кездеспек. Кездесу 8-сәуірге жоспарланған. Бас консулдың құттықтауымен ашылатын семинар-тренингке қатысу үшін елдің өзге аймақтарынан отызға жуық БАҚ өкілдері келеді, деп хабарлайды Qazaq.Today ақпараттық агенттігі.
Айтулы шараны «Түркітілдес журналистер қоры» қоғамдық қоры ұйымдастырып жатыр. Екі күнге созылатын шараны Америка Құрама Штаттарының дипломатиялық миссиясы қолдаған.
«Семинар-тренингтің ашылу салтанатына Қазақстандағы Америка Құрама Штаттарының Бас консулы Кэролайн Сэвидж қатысып, журналистермен кездеседі. Британиядағы «Avrupa» медиа холдингінің басшысы Ватан Өз бен ВВС телеарнасының Нидерландтағы меншікті тілшісі Юсуф Өзкан медиа тренер болады. Іс-шараға Алматы қаласымен бірге Қазақстанның барлық облыс, аудан, аймақтарындағы телеарна, газет, сайт, радиоарналарда жұмыс істейтін БАҚ өкілдері қатысады. Семинар-тренингтің басты мақсаты – журналистердің ақпарат алу және таратудағы кәсіби білігін арттыру, фактчек жасау тәсілдерін меңгерту, деректерді тексеру, жалған ақпаратпен күресуге үндеу», -деді «Түркітілдес журналистер қоры» ҚҚ президенті Нәзия Жоямергенқызы.
Семинар барысында БАҚ өкілдері «Fake news. Fact-checking. Information manipulation» тақырыбына білімдерін жетілдіре алады.
