«2023 жылғы 25 қазанда сағат 10:49-да ТЖБ күштері мен құралдарын жедел басқару орталығының пультіне Аягөз қаласының жеке үйлерінің бірінде түтін шыққандығы туралы сигнал келіп түсті. 6 адамнан тұратын құтқарушылар бригадасы дереу сол жерге кетті», — делінген хабарламада.
Өрт сөндірушілер оқиға орнына келгеннен кейін бөлмелердің бірінде 20 шаршы метрде жиһаздар мен жеке заттары жанғаны анықталды. Өрт сағат 11:10-да оқшауланып, 11.24-ге толық сөндірілді.
«Оқиға орнында төрт баланың денесі табылды. Өлімнің себебі анықталуда. Тиісті сараптама тағайындалып, полиция тергеу жүргізіп жатыр. Қазіргі уақытта отбасы мүшелеріне барлық қажетті көмек көрсетілуде», — делінген хабарламада.
Жағдай ЖАО бақылауында.
Аbainewskz Телеграм-арнасының жазуынша, 8 жасар егіздер мен олардың 3 және 2 жастағы інілері көмірқышқыл газынан уланып қайтыс болған. Балалардың әкесі жедел жәрдем жүргізушісі болып жұмыс істейтіні және оқиға кезінде жұмыста болғаны, ал анасы базардан азық-түлік сатып алуға шыққаны хабарланды.
Ал журналист Гүлмира Әбіқай, отбасына АӘК әкімдіктің бермегенін хабарлады. Оның сөзінше, төрт баланың анасы базарға сүт сатуға шығып кеткенде газ баллоны жарылған.
«Бұл отбасын жақсы білетін Аягөздік оқырмандарымның айтуынша, балалардың әкесі сантехник, анасы жұмыссыз. Аудандық басшылар табысың көп деп мемлекеттен алып отырған АӘК кесіп тастапты. Қайран шеше 4 балаға нәпақа болсын деп сүт сатуға үйден шығып кеткен екен. Базарға жүгіріп барып келгенде құлыншақтарының орнын сипап қалды. Көз алдындағы баладан әп сәтте айырылу деген қандай қиын… ешкімнің басына бермесін. Ананың декреттік уақытын балаға көңіл бөлу орнына нан табуға жүгіртіп қойған қу жоқшылық-ай. Барша оқырманым атынан Аякөз жұртына, қайғы жамылған ата-анаға көңіл айтамын.Трагедия тура 25 қазан, Республика күні таң атпай болды. Бірақ, мұны @akimataiagozАягөз Ауданының Әкімдігі неліктен жасыруға тырысқаны түсініксіз?4 баланың өлімі жайлы жазған жергілікті блогерлерді қудалап, жазбасын өшіртуін қалай түсінеміз @abai_oblysynyn_akimdigi ?Бәлкім енді бұл отбасына табиғи газбен жылитын үй берілетін шығар?Бірақ, 4 періштенің әке-шешесін ешкім және ештеңе жылыта да, жұбата да алмайды-ау», -деп жазды журналист.
