Қ.Сәтбаев атындағы Қазақ ұлттық техникалық университетінде Ұлықпан Сыдықовтың шығармашылық орталығы ашылды. Ұлықпан Есілханұлы — әйгілі «Дос-Мұқасан» тобының тегізін қалаушы, әрі осы Политехтың түлегі. Қазақстанның еңбек сіңірген қайраткері, ҚР Ұлттық жаратылыстану ғылымдары академиясының академигі, философия ғылымының докторы, профессор.
Ұлықпан Есілханұлы «Тың игергені үшін», «Озат еңбегі үшін», «Білім және тәрбие ісінің үздігі» медальдарымен, Қазақ КСР Жоғарғы Кеңесінің құрмет грамотасымен марапатталған. Қорқыт ата атындағы Қызылорда мемлекеттік университетінің «Құрметті профессоры», Үржар ауданының «Құрметті азаматы».
Ол 1948 жылы 10 қаңтарда Семей облысы, Тарбағатай ауданы Шағантоғай ауылында дүниеге келген. 1965 жылы Мақаншы ауданында С.Сейфуллин атындағы орта мектепті алтын медальмен бітірген. 1970 жылы В. И. Ленин атындағы Қазақ политехникалық институтын қызыл дипломмен тәмамдаған.
«Ұлықпан Есілханұлының қанатынан өрбіп шыққан, білім алған шәкірттері бұл күнде Қазақстанның түкпір-түкпірінде еліміздің дамуына кірпіш болып қаланып, өз үлестерін қосуда. Ұлықпан Есілханұлы бар саналы ғұмыры мен өмірін білім мен ғылымға арнаған ұлағатты ұстаз, академик, ардақты әке, аяулы азамат. Университеттің құрметті ұстазы, «Дос-Мұқасан»-ның негізін қалаушылардың бірі», — деді университеттің қоғаммен байланыс орталығы.
Шығармашылық орталықтың ашылуына ҚР Білім және ғылым министрлігінің, Алматы қаласы Мәдениет басқармасының өкілдері мен ақын-жазуылар қатысты. Университет қабырғасында ашылған орталықтың мақсаты, негізі мамандықтары техника саласы болса да, өнерлі жастардың басын қосып, түрлі мәдени іс-шараларды өткізу.
