Алматыда 2024 жылдың қыркүйегінен бастап суық су мен кәріз жүйесіне төлем тарифтері өзгерді, және енді олар тұтыну көлеміне қарай сараланған. Тұрғындар үшін суға төлем жасау төрт топқа бөлінген:
- I топ – айына 3 текше метрге дейін су тұтынатындар үшін, суық су тарифі бір адамға 1 текше метр үшін ҚҚС қосқанда 73,92 теңгені құрайды;
- II топ – айына 3-5 текше метр аралығында су тұтынатындар үшін, тариф бір адамға 1 текше метр үшін 88,72 теңге болады;
- III топ – айына 5-10 текше метр аралығында су тұтынатындар үшін, тариф бір адамға 1 текше метр үшін 110,89 теңге болады;
- IV топ – айына 10 текше метрден артық су тұтынатындар мен су есептеуіш құралдары жоқ тұтынушылар үшін, тариф бір адамға 1 текше метр үшін 147,85 теңгені құрайды.
Заңды тұлғалар мен ұйымдар үшін суық су тарифі 1 текше метр үшін 379,99 теңге болады.
Бұл өзгерістердің негізгі мақсаты – су ресурстарын үнемдеу және су шығынын бақылау арқылы тұрғындарға қаржылық үнем жасауға мүмкіндік беру. Тарифтерді саралау су тұтыну мөлшерін қадағалап, артық шығындарды болдырмауға ықпал етеді. Тарифтердің өзгеруі «Инвестицияға айырбасталған тариф» бағдарламасы аясында инженерлік инфрақұрылымды жаңарту қажеттілігіне байланысты енгізілді.
