Алматыда қала күніне орай ғажайып Халықаралық фестиваль өтіп жатыр

Қала күнін атап өту аясында Орталық мәдениет және демалыс саябағында бақтар, гүлдер және ландшафттық өнер бойынша «Almaty Garden Show» фестивалі басталды, деп хабарлайды Qazaq.today.

Фестиваль үш күнге жалғасады. Қонақтарға әлемнің жетекші дизайнерлерінен, бағбандар мен гүл өсірушілерден шеберлік сабақтары өткізіледі. Сарапшылар кәсіби көгалдандыру, гүл шоқтарын заманауи түрде жасау және ландшафттық дизайнның жаңа трендтері бойынша ұсыныстармен бөліседі. Жылыжайлардың иелері, бау-бақша жабдықтарын жеткізушілер «Бақшаның сәні» бойынша соңғы жетістіктерін көрсетеді.

«Іс-шара Алматыда он бірінші рет өтіп жатыр. Өткен жылы «Almaty Garden Show» көрмесіне 30 мың адам келді. Дәстүр бойынша фестиваль аясында конкурстар өткізіледі, оның қорытындысында әр түрлі номинациялардағы жеңімпаздар дипломдармен және ақшалай сыйлықтармен марапатталады», — деді Алматы қаласы Экология және қоршаған орта басқармасының баспасөз хатшысы Ажар Нұрсеит.