Алматы облысының Полиция департаменті ұйымдасқан қылмысқа қарсы күрес басқармасының қызметкерлері ведомствоның арнайы жасағымен бірге Алматы, Жетісу облыстары мен Алматы қаласында азаматтарды бопсалаумен айналысқан топты ұстады.
Топта 21-46 жас аралығындағы жеті адам болған.
Polisia.kz-тің хабарлауынша, бұл факт полицияда ҚР ҚК-нің 194-бабы 2-бөлігінің 2-тармағы (Бопсалау) бойынша тіркелген.
«Күдіктелер биылғы жылдың 11 наурызында Қаскелең қаласындағы қоймалардың бірінде шетелдік азаматты ұрып, қоқан-лоққы жасап, ірі көлемде ақша бопсалаған», – деді Алматы облысы ПД ұйымдасқан қылмысқа қарсы күрес басқармасының бастығы Дулат Қайыр.
Оның айтуынша, күдіктілер көп ұзамай, ұсталып, қамауға алынды. Қазір күдіктілердің басқа да қылмыстарға қатысы бар-жоғын тексеріліп жатыр. Осы жұмыстардың нәтижесі бойынша іс материалдары түпкілікті шешім қабылдау үшін сотқа жіберілетін болады.
