«Алла нәсіп етсін»: Ангелина Лукас титулдық жекпе-жектен соң мәлімдеме жасады
Қазақстандық боксшы қыз Ангелина Лукас кеше, 22 қазанда Түркияда кәсіпқой бокстағы екінші кездесуін өткізді. Ол титулдық жекпе-жектен кейін мәлімдеме жасап, әліде көптеген чемпиондық атақтар үшін шаршы алаңға шығатынын мәлімдеді.
«Бүгін алғашқы чемпиондық титулымды жеңіп алдым! Алла маған Қазақстан үшін әлі де көптеген атақтарға қол жеткізуді нәсіп етсін. Алға, Қазақстан!», – деді былғары қолғап шебері.
Стамбул қаласында өткен бокс кешінде Ангелина Лукас Украина өкілі Алена Гуриевамен жұдырықтасты. Сегіз раундқа жоспарланған жекпе-жек соңына дейін жеткен жоқ. Екінші раундта Ангелина Лукас қарсыласын нокаутқа жіберді. Осылайша, отандық боксшы жеңіл салмақтағы UBO International титулын жеңіп алды. Бұл Ангелина Лукастың кәсіпқой бокстағы екінші кездесуі.
