Талдықорғанда Шерзат Полаттың өліміне қатысты сот отырысында жарыссөз жалғасып жатыр, деп хабарлайды Qazaq Today ақпарат порталы.
Cотталушы Дидар Қалиахметтің адвокаты Гауһар Баймұханова қаза тапқан Шерзат Полаттың, оның ағасы Нұрқанат Ғайыпбаевтың және Қаржаубай Нұрымовтың үстінен бұзақылық бойынша қылмыстық іс қозғауды талап етті.
Қорғаушының айтуынша, бақылау камерасындағы видеода Шерзаттың әкесі Қаржаубай дүкеннен қолына пышақ алып шыққан.
«Жарыссөз барысында жәбірленуші тараптың адвокаты Мейірман Шекеевтің өзі де оның қорғауындағы адамдардың қару қолданғанын растады. Бейнежазбада Қаржаубай Нұрымов дүкеннен үш рет бірінші болып пышақ алып шығып қолданғанын ескеруіңізді сұраймын. Құрметті сот, сізден Шерзат Полатқа, Нұрғанат Ғайыпбаевқа және Қаржаубай Нұрымовты қатысты ҚР ҚК 293-бабының 3-бөлігімен қылмыстық құрамының болуына байланысты қылмыстық іс қозғау туралы жеке қаулы шығаруды және оны Алматы облысының прокуратурасына процессуалдық шешім қабылдау үшін жолдауды сұраймын», — деді адвокат.
Еске салайық, бұған дейін прокурор Дана Сарсенбай дәл осы бап ҚР ҚК 293-бабының 3-бөлігі бойынша Дидар Қалиахметті 7 жыл бас бостандығынан айыруды сұраған болатын.
