Фото: Видеодан алынған кадр
«Шымбұлақ» тау-шаңғы курортындағы Gusto мейрамханасында қазақ тілінде қызмет көрсетуден бас тартқаны үшін сынға ұшыраған әкімші көпшілік алдында кешірім сұрады, деп хабарлайды Qazaq Today ақпарат порталы.
Елена есімді әкімші заңгер Мейірман Шекеевпен кездесіп, оның Instagram парақшасы арқылы халықтан ресми түрде кешірімін жеткізді.
«Өз сөздерім үшін отандастарымнан кешірім сұраймын. Мен де Қазақстан азаматы ретінде эмоцияға беріліп, “КСРО-да туғанмын” деп айтқаным үшін халқымнан кешірім өтінемін. Ешкімді ренжіткім келген жоқ. Сол себепті кешірімдеріңізді сұраймын», – деді ол видеода.
Мейірман Шекеевтің айтуынша, тараптар кездесіп, мәселені өзара келісіммен реттеуге келіскен. Бұдан бөлек, заңгер Gusto мейрамханасына барып, әкімшілікпен сөйлесіп, мәзірдегі қателерді түзетуді сұраған. Мейрамхана басшылығы да жағдай үшін кешірім сұрап, кемшіліктерді жоюға уәде берген.
